Koronavirus pandemiyasi sababli 2020-yilning bahoridan chegaralari yopiq bo‘lgan Avstraliyada Birinchi jahon urushi davridan buyon birinchi marta uch oy davomida aholi sonining qisqarishi qayd etildi. Bu haqda Avstraliya Statistika byurosining demografiya masalalari bo‘yicha direktori Fil Brauningga tayanib “Interfaks” xabar berdi.

Foto: Living in Travels

2020-yilning birinchi choragida mamlakat aholisi 4200 nafarga kamayib, 25 693 059 nafarni tashkil qilgan. 55 400 kishi Avstraliyadan ko‘chib ketdi, 20 600 kishi ko‘chib keldi.

Bungacha aholi sonining kamayishi Birinchi jahon urushi davrida, 1916-yilning oxirgi choragida kuzatilgan, deb yozmoqda Sydney Morning Herald. O‘shanda qit’a aholisi 51 500 nafargacha kamayib ketgan.

Mutaxassislar aholi sonining qisqarishini muhojirlar oqimining kamayishi va tug‘ilish darajasining pastligi bilan izohlamoqda.

2019-yilning sentabr oyida Avstraliya aholisi o‘sishining 63 foizi muhojirlar hisobiga yuz bergan, 2020-yilda bu ko‘rsatkich 39 foizgacha tushib ketdi. Haligacha yopiq chegaralar muhojirlar oqimining yanada pasayish xavfini yaratmoqda, chunki Avstraliyaga ko‘chib o‘tishni istaganlar uchun barcha hujjatlarni to‘g‘ri rasmiylashtirish murakkab hisoblanadi.

KPMG (Klynveld Peat Marwick Goerdeler — xalqaro auditorlik kompaniyasi) iqtisodchisi Brendan Rinnening ma’lum qilishicha, Avstraliyaga muhojirlarning sof oqimi oxirgi 12 oy ichida deyarli 65 foizga kamaydi.

2020-yilda tug‘ilish darajasi 2,2 foizga yoki 7000 nafarga qisqardi, mamlakatda 299 500 nafar bola tug‘ildi. Bu so‘nggi 11 yil ichidagi eng past ko‘rsatkich va bu tug‘ilishning 24 yil ichidagi eng katta pasayishi. Mutaxassislar tug‘ilish darajasining pasayishini odamlarning iqtisodiyot istiqbollariga nisbatan ishonchsizligi bilan izohlaydi.

Worldometers hisob-kitoblariga ko‘ra, Avstraliyada pandemiya boshlanganidan buyon koronavirus infeksiyasiga chalinish bilan bog‘liq 29 164 ta holat qayd etilgan, 909 kishi virus qurboniga aylandi.

Avvalroq koronavirus pandemiyasi fonida 2020-yilda dunyo bo‘ylab global erkinlik darajasi pasaygani haqida xabar berildi. Hozirda dunyo aholisining 20 foizidan kamrog‘i “erkin” mamlakatlarda, 38 foizi “erkin bo‘lmagan” davlatlarda yashaydi.