Turkiya va Hindistonda rekord darajada ko‘p odam koronavirusga chalindi, Rossiyaga har qanday transportda qaytayotgan fuqarolar test topshirishi shart, Qozog‘istonda necha kishi emlanganidan keyin COVID-19’ni yuqtirdi? Koronaxabarlar

Jons Hopkins universiteti ma’lumotlariga ko‘ra, dunyoda pandemiya boshidan buyon COVID-19’ga chalinganlar soni 138 302 131 kishiga yetdi. Vafot etganlar soni esa 2 973 874 kishini tashkil qilmoqda. Kasallanganlar soni bo‘yicha hamon AQSh (31,4 million), Hindiston (14 million), Braziliya (13,6 million), Fransiya (5,2 million) va Rossiya (4,6 million) yetakchilik qilmoqda.

Buyuk Britaniyadan keyingi, yettinchi o‘rinda turgan Turkiyada esa koronavirusni yuqtirganlar soni 4 milliondan oshib ketdi. 14-aprel holatiga ko‘ra, so‘nggi bir kecha-kunduzda mamlakatda COVID-19’ni yuqtirib olganlar soni bo‘yicha rekord qayd etildi — 62 797 kishida virus aniqlandi, shuningdek, bemorlarning 279 nafari vafot etdi — bu ham rekord ko‘rsatkich hisoblanadi.

Aprel boshidan buyon koronavirusga chalinganlar sonining sutkalik o‘sishi bo‘yicha rekord sakkiz marta yangilandi. So‘nggi marta bu 13-aprel kuni qayd etilgandi (59 187 kishi).

Hindistonda esa o‘tgan bir kun ichida COVID-19’ga chalinish bilan bog‘liq 200 mingdan ortiq holat qayd etildi. Sog‘liqni saqlash vazirligi ma’lumotlariga ko‘ra, bu rekord ko‘rsatkichdir. Shuningdek, bir kecha-kunduzda 1038 bemor koronavirusdan vafot etib, jami o‘lim holatlari soni 175 mingtaga yetdi.Ayni vaqtda Yevropaning ayrim mamlakatlarida vaziyat yaxshilanishi ortidan cheklovlar yumshatilmoqda. Xususan, Belgiya va Shveysariyada koronavirus bo‘yicha cheklovlarni asta-sekinlik bilan yumshatish rejalashtirilmoqda.

“Biz kasallanishning eksponensial o‘sish sharoitida emasligimiz aniq, ba’zilar aynan shundan xavfsiragan edi. Biz aniq bunday vaziyatda emasmiz. Va balki, ayni paytda biz avj nuqtadan o‘tib bo‘lgandirmiz, ammo bu ma’lumot tasdiqlanishi kerak”, — dedi Belgiya bosh vaziri Aleksandr De Kroo hududiy va federal hukumatlar rahbarlaridan iborat muvofiqlashtirish qo‘mitasi majlisidan keyin. Shu bilan birga, u virus hali aholi orasida keng tarqalib turganini qo‘shib qo‘ydi. Shunga qaramay, qo‘mita uzoq davom etgan munozaralardan keyin, infeksiya bilan bog‘liq vaziyat ustidan o‘rnatilgan nazorat tufayli COVID-19’ga qarshi rejimni yumshatish choralari ko‘rilishi mumkin, degan qarorga keldi.

Xususan, 19-apreldan boshlang‘ich maktab va o‘rta maktabning pastki sinflarida odatiy darslar tiklanadi, 26-apreldan barcha do‘konlar to‘liq ochiladi, 8-maydan esa restoran va kafelar mijozlarni ochiq ayvonlarda qabul qilishi mumkin bo‘ladi.

Shveysariyada ham cheklov choralari yumshatilib, 19-apreldan jamoatchilik tadbirlari, shu jumladan, inshootlardagi sport va madaniy tadbirlar o‘tkazishga ruxsat beriladi. Restoranlar ham kelasi haftadan ayvonlarini ochadi.15-apreldan har qanday transport vositasida yoki piyoda o‘z mamlakatiga qaytayotgan Rossiya fuqarolarining barchasi koronavirusga test topshirishi kerak. Bu haqda “Rospotrebnadzor” ma’lum qildi. Bungacha test topshirish faqat samolyotda uchib kelganlar uchun majburiy edi. Chegarani quruqlik orqali bosib o‘tishda u talab etilmas edi.

PZR-test uch kalendar kuni ichida topshirilishi va natijalar “Davlat xizmatlari” portaliga yuklanishi kerak. Test javobi chiqqunicha o‘z-o‘zini yakkalash rejimiga o‘tish lozim.

16 nafar qozog‘istonlik koronavirusga qarshi emlanganidan keyin ushbu virusni yuqtirib oldi. Bu haqda mamlakat Sog‘liqni saqlash vazirligining Sanitar-epidemiologik nazorat qo‘mitasi ma’lum qildi.

“Bugungi kunda vaksina olgandan keyin (birinchi va ikkinchi bosqichlarini) koronavirus infeksiyasiga chalinish bilan bog‘liq 16 ta holat qayd etilgan. Ushbu holatlar ichidagi eng kech sana — vaksinaning ikkinchi dozasini olgandan keyingi to‘rtinchi hafta”, — deya ma’lum qilishdi qo‘mitada. Ta’kidlanishicha, vaksinatsiyadan keyingi koronavirusga qarshi immunitet ikkinchi komponentni olgan vaqtdan boshlab olti hafta o‘tgach shakllanadi.

AQShning Johnson & Johnson kompaniyasi o‘zining COVID-19’ga qarshi vaksinasining foydasi uning xavfidan ustun ekanini ma’lum qildi. Ushbu vaksinaning xavfsizligi va samaradorligi haqida tibbiyot fanlari doktori, kompaniya ijroiya qo‘mitasi raisi o‘rinbosari va bosh ilmiy xodimi Pol Stoffels ma’lum qildi. “Biz vaksinamizning foydasi va xavfi o‘rtasidagi ijobiy nisbatga hamon ishonamiz”, — dedi u.Daniya AstraZeneca vaksinasi bilan emlashdan butunlay voz kechgan birinchi mamlakatga aylandi. Bunday qaror ushbu dori bilan emlashning tromboz va qon ketishi holatlari bilan ehtimoliy bog‘liqligi tufayli qabul qilingan.