AQSh davlat kotibi Entoni Blinken 15-aprel kuni e’lon qilinmagan tashrif bilan Afg‘oniston poytaxti Kobulga keldi. Bu haqda Associated Press agentligiga tayanib, “Interfaks” xabar berdi.
“AQSh davlat kotibi Entoni Blinken Jo Baydenning qo‘shinlarni olib chiqish to‘g‘risidagi qarorini shaxsan yetkazish uchun Afg‘onistonga kutilmagan tashrif bilan keldi” — deya xabar beradi agentlik.
Associated Press xabariga ko‘ra, Blinken Kobulda Afg‘oniston prezidenti Ashraf G‘ani, Milliy yarashuv bo‘yicha oliy kengash raisi Abdulla Abdulla va fuqarolik jamiyati vakillari bilan uchrashgan.
“Men ushbu tashrifim orqali Qo‘shma Shtatlarning Islom Respublikasi va Afg‘oniston xalqiga sadoqatini davom ettirishni namoyish qilmoqchi edim”, — dedi Blinken Ashraf G‘ani bilan uchrashuvda. “Hamkorlik shartlari o‘zgarib bormoqda, ammo u barqaror”, — deya qo‘shimcha qildi u.
Agentlikning aniqlik kiritishicha, davlat kotibi Kobulga 12–15-aprel kunlari Bryusselga uyushtirgan tashrifidan so‘ng kelgan.
AQSh Afg‘onistondan o‘z qo‘shinlarini 11-sentabrgacha olib chiqishi haqida rasman e’lon qilgan edi. Uning ketidan Britaniya ham harbiylarini olib ketadi.
Entoni Blinken 14-aprel kuni NATOga o‘z qo‘shinlarini Afg‘onistondan uyiga olib kelish vaqti kelganini ma’lum qilgan edi. AQShning Tolibon bilan tuzgan 2020-yilgi kelishuviga ko‘ra, AQSh va NATO 2021-yil 1-mayga qadar Afg‘onistondan o‘z qo‘shinlarini olib chiqishni boshlashi kerak.
AQShning Afg‘onistondagi harbiy operatsiyasi 2001-yil oktabridan beri davom etmoqda va Amerika tarixidagi eng uzoq muddatli harbiy kampaniyaga aylangan. 2010—2013-yillarda Afg‘onistondagi G‘arb kuchlari soni eng yuqori cho‘qqisiga chiqib, 150 ming kishidan oshgan. AQSh va NATOning asosiy jangovar kuchlari 2014-yilda Afg‘onistondan chiqarilgan.
Izoh (0)