Amerika Qo‘shma Shtatlari Rossiyaga qarshi yangi sanksiyalarni tayyorladi. Cheklovlar rasman 15-aprelda e’lon qilinishi kutilmoqda. Bu haqda Amerika ommaviy axborot vositalariga tayanib, Meduza xabar berdi.
Bloomberg ma’lumotlariga ko‘ra, sanksiyalar 10 ga yaqin jismoniy shaxsga xususan, Rossiya hukumati va maxsus xizmatlariga aloqador kishilarga va 20 ga yaqin kompaniyaga ta’sir qiladi. Reuters yozishicha, 30 ta kompaniya cheklovlar ostiga tushadi.
Shuningdek, AQSh Rossiyaning 10 ga yaqin rasmiy vakilini mamlakatdan chiqarib yuborishni rejalashtirmoqda, deb xabar beradi Bloomberg. Avvalroq agentlik diplomat niqobi ostida ish olib borayotgan Rossiya razvedka xizmati xodimlarini AQShdan chiqarib yuborilishi haqida yozgan edi.
Bundan tashqari, Amerika rasmiylari Rossiyaning suveren qarzlariga cheklovlar qo‘ymoqchi. The Wall Street Journal nashrining yozishicha, 14-iyundan keyin AQSh moliya institutlari Rossiya Markaziy banki, Rossiya Moliya vazirligi va Milliy farovonlik fondidan davlat zayomlarini sotib ololmaydi.
OAV xabar berishicha, yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlar uchun AQSh rasmiylari unga qarshi sanksiyalar rejalashtirayotganini aytgandi.
Eslatib o‘tamiz, 2021-yil 2-mart kuni esa Yevroittifoq va AQSh siyosatchi Aleksey Navalniy bilan bog‘liq vaziyat tufayli rossiyalik amaldorlarga qarshi sanksiyalar kiritdi. Rossiya Tashqi ishlar vazirligi Yevroittifoq va AQShning yangi sanksiyalarini “Rossiyaga qarshi dushmanlarcha hamla” deb atadi.
Izoh (0)