Xitoy jamoat xavfsizligi vazirligi ma’lumotlariga ko‘ra, 2020-yilda mamlakatda tug‘ilish darajasi avvalgi yilga nisbatan 30 foizga kamaygan. Bu haqda “Interfaks” xabar berdi.

Foto: “TASS”

“2020-yilda jamoat xavfsizligi organlari tomonidan doimiy yashash joyida ro‘yxatdan o‘tgan yangi tug‘ilgan chaqaloqlarning soni 10 million 35 ming nafarni tashkil etdi, shulardan 5,29 millioni yoki 52,7 foizini o‘g‘il bolalar, 4,74 millioni yoki 47,3 foizini qizlar tashkil etadi”,— deyiladi vazirlik hisobotida.

Milliy statistika byurosining ma’lumotlariga ko‘ra, Xitoyda 2019-yilda 14,65 million, 2018-yilda 15,23 million, 2017-yilda 17,23 million va 2016-yilda 17,86 million chaqaloq tug‘ilgan. Shu tarzda 2020-yilda yangi tug‘ilgan chaqaloqlar soni 30 foizga kamaygan.

1979-yildan 2016-yilgacha Xitoy “bir oilada bir bola” siyosatini olib bordi. Buning salbiy oqibatlaridan biri sifatida mehnatga layoqatli aholining qisqarishi yuzaga keldi. Endi mamlakatdagi istalgan oila ikkita farzandli bo‘lishi mumkin.

Avvalroq Tojikistonda 2020-yilda vafot etganlar soni 2019-yilga nisbatan 8,6 mingga ko‘paygani haqida xabar berilgandi. Xabarga ko‘ra, o‘limlarning aksariyati yurak xastaligi tufayli yuz bergan.

Rossiyada esa 2020-yilda aholi soni rekord darajada pasaygan. Aholi soni 510,5 ming kishiga kamayib, bu 2005-yildan buyon eng keskin pasayish bo‘lgan.