Serbiya Rossiyaning koronavirusga qarshi “Sputnik V” vaksinasini ishlab chiqarishni boshladi. Bu haqda preparat ishlab chiqaruvchisi Twitter’da ma’lum qildi, deb yozadi “Interfaks”.
BREAKING: #Serbia starts #SputnikV production!
— Sputnik V (@sputnikvaccine) April 14, 2021
RDIF & Institute of Virology, Vaccines and Sera “Torlak” join forces to bring more Sputnik V vaccines to the world!
✌️ pic.twitter.com/mi1iImbbD0
Xabarga ko‘ra, vaksinani ishlab chiqarish “Torlak” vaksina va zardoblar virusologiya instituti negizida yo‘lga qo‘yilgan. Zavodning quvvati yiliga 20 million dozagacha vaksina ishlab chiqarishga imkon beradi.
Bir kun oldin Rossiya to‘g‘ridan to‘g‘ri investitsiya fondi (RDIF) rahbari Kirill Dmitriyev Hindistonda ham ushbu vaksinani ishlab chiqarish boshlanganini e’lon qildi. Hindiston 13-aprel kuni Rossiya dori vositasidan foydalanishni ma’qullagan edi. U yerda RDIF beshdan ortiq yirik ishlab chiqaruvchilar bilan kelishuvga ega. Unga ko‘ra, RDIF barcha ishlab chiqarish maydonlarida vaksinaning sifatini nazorat qilishni ta’minlaydi va kafolatlaydi. Dmitriyev vaksinani ishlab chiqarish bo‘yicha dunyoning 10 mamlakatidagi 20 ta ishlab chiqaruvchi bilan shartnoma tuzilganini qayd etib o‘tdi.
Xususan, “Sputnik V” yaqin kelajakda Eronda, yaqin oylarda esa Italiyada ishlab chiqarilishi ma’lum qilindi.
“Rossiya vaksinasi allaqachon Belarus, Qozog‘iston va Serbiyada ishlab chiqarilmoqda. Yaqinda Eronda preparatni ishlab chiqarish boshlanadi”, — dedi Dmitriyev.
Uning so‘zlariga ko‘ra, Italiyadagi Adienne Pharma & Biotech kompaniyasining zavodida ham preparatni ishlab chiqarish rejalashtirilgan.
Mart oyida Italiya—Rossiya savdo palatasi “Sputnik V” ni ishlab chiqarish Milanda rejalashtirilganini e’lon qildi. Preparatni RDIF bilan shartnoma imzolagan Adienne Pharma & Biotech shved kompaniyasi ishlab chiqaradi. Italiyada vaksinani 2021-yilning uchinchi choragida chiqarish rejalashtirilgan.
Eronda “Sputnik V” yanvar oyining oxirida ro‘yxatdan o‘tkazilgan edi. Shu bilan birga, mamlakat tashqi ishlar vaziri vaksinani mamlakat hududida ishlab chiqarilishiga umid bildirgan.
7-fevral kuni Eron sog‘liqni saqlash vazirining o‘rinbosari Muhammad Rizo Shanehsoz mamlakat ushbu masala bo‘yicha Gamaleya markazi bilan muzokaralar olib borayotganini aytdi. Mart oyining oxirida Eronning Rossiyadagi elchisi Kozei Jalali Eronda “Sputnik V” ni ishlab chiqarish aprel oyida boshlanishi kerakligini ma’lum qildi.
Rossiyaning Gamaleya markazida ishlab chiqariladigan “Sputnik V” vaksinasi ayni paytda 60 ta mamlakatda ro‘yxatdan o‘tkazilgan. Xususan, “Sputnik V” vaksinasi Vengriya, Livan, Serb Respublikasi, Jazoir, Argentina, Belarus, Boliviya, BAA, Serbiya, Falastin, Paragvay, Pokiston, Turkmaniston va Venesuelada foydalanish uchun tasdiqlangan.
Izoh (0)