АҚШ давлат котиби Энтони Блинкен 15 апрель куни эълон қилинмаган ташриф билан Афғонистон пойтахти Кобулга келди. Бу ҳақда Associated Press агентлигига таяниб, «Интерфакс» хабар берди.
«АҚШ давлат котиби Энтони Блинкен Жо Байденнинг қўшинларни олиб чиқиш тўғрисидаги қарорини шахсан етказиш учун Афғонистонга кутилмаган ташриф билан келди» — дея хабар беради агентлик.
Associated Press хабарига кўра, Блинкен Кобулда Афғонистон президенти Ашраф Ғани, Миллий ярашув бўйича олий кенгаш раиси Абдулла Абдулла ва фуқаролик жамияти вакиллари билан учрашган.
«Мен ушбу ташрифим орқали Қўшма Штатларнинг Ислом Республикаси ва Афғонистон халқига садоқатини давом эттиришни намойиш қилмоқчи эдим», — деди Блинкен Ашраф Ғани билан учрашувда. «Ҳамкорлик шартлари ўзгариб бормоқда, аммо у барқарор», — дея қўшимча қилди у.
Агентликнинг аниқлик киритишича, давлат котиби Кобулга 12–15 апрель кунлари Брюсселга уюштирган ташрифидан сўнг келган.
АҚШ Афғонистондан ўз қўшинларини 11 сентябргача олиб чиқиши ҳақида расман эълон қилган эди. Унинг кетидан Британия ҳам ҳарбийларини олиб кетади.
Энтони Блинкен 14 апрель куни НАТОга ўз қўшинларини Афғонистондан уйига олиб келиш вақти келганини маълум қилган эди. АҚШнинг Толибон билан тузган 2020 йилги келишувига кўра, АҚШ ва НАТО 2021 йил 1 майга қадар Афғонистондан ўз қўшинларини олиб чиқишни бошлаши керак.
АҚШнинг Афғонистондаги ҳарбий операцияси 2001 йил октябридан бери давом этмоқда ва Америка тарихидаги энг узоқ муддатли ҳарбий кампанияга айланган. 2010—2013 йилларда Афғонистондаги Ғарб кучлари сони энг юқори чўққисига чиқиб, 150 минг кишидан ошган. АҚШ ва НАТОнинг асосий жанговар кучлари 2014 йилда Афғонистондан чиқарилган.
Изоҳ (0)