Rossiyaning Biologik xavfsizlik va texnologik mustaqillik markazi o‘latga qarshi dunyodagi brinchi vaksinani yaratdi. Bu haqda mamlakat bosh vazirining o‘rinbosari Tatyana Golikova ma’lum qildi, deb yozadi “RBK”.
“Subbirlik vaksinalarni ommaviy ishlab chiqarish uchun genetik texnologiyadan foydalangan holda moslashtirilgan vaksina shtammlari yaratildi”, — dedi Golikova.
Uning so‘zlariga ko‘ra, mazkur shtammlar o‘latga qarshi dunyodagi birinchi vaksinani yaratish jarayonida sinovdan o‘tkazilgan.
Ta’kidlanishicha, subbirlik vaksinalarida immunitet tizimiga tanish bo‘lgan virus yoki bakteriyaning bo‘laklaridangina foydalaniladi. Vaksinalarda butun mikroorganizmlar yoki zararsiz viruslar mavjud emas.
Rossiya Iste’molchilar huquqlarini himoya qilish va inson farovonligini nazorat qilish federal xizmati (“Rospotrebnadzor”) Rossiyaning Mo‘g‘uliston va Xitoy bilan chegaradosh hududlarida o‘latning tabiiy o‘choqlari mavjudligini xabar qilgan.
Avvalroq Qozog‘iston olimlari radiatsiyaga qarshi dunyodagi birinchi dorini yaratgani haqida xabar berilgandi. Qozog‘iston tibbiyot olimlari odatda qon ketishni to‘xtatishda foydalaniladigan “aminokaproik kislota” preparati inson tanasini nurlanishdan samarali himoya qilishga qodir ekanini aniqlagan.
Izoh (0)