Misr prezidenti Abdul-Fattoh as-Sisi Ever Given kemasining sayozlikka tiqilib qolishi oqibatida to‘sib qo‘yilgan Suvaysh kanalini blokdan chiqarish ishlari muvaffaqiyatli yakunlanganini e’lon qildi. Kanal bo‘ylab kemalar qatnovini uch yarim kun ichida to‘liq tiklash rejalashtirilmoqda, deb yozadi “RBK”.
“Bugun misrliklar turli jabhalardagi katta texnik qiyinchiliklarga qaramay, Suvaysh kanalidagi inqirozni tugatishga muvaffaq bo‘ldi. Misrliklarning qo‘llari bilan ishlarni normal holatga qaytarish natijasida butun dunyo o‘z tovar va ehtiyojlarini ushbu bo‘ylama kemalar qatnov yo‘li orqali o‘tkazishda davom etishi mumkin”, — dedi prezident.
Suvaysh kanali ma’muriyati rahbari Usama Rabiyening aytishicha, kemalarning kanal orqali normal harakatini tiklash uchun uch yarim kun kerak bo‘ladi. Uning ta’kidlashicha, Ever Given to‘liq ishga tushirilgandan so‘ng kema texnik ko‘rik uchun Buyuk ko‘llar mintaqasiga yuboriladi, shundan keyin kanal bo‘ylab kemalar harakati qayta tiklanadi. “Hodisa oqibatida navbatda turib qolgan barcha kemalarni o‘tkazib yuborish va tirbandlikni tugatish uchun kanal sutkasiga 24 soat ishlaydi”, — deya qo‘shimcha qildi u.
Rabiyening so‘zlariga ko‘ra, Ever Given’ni tortib olish jarayonida mutaxassislar kemadagi yoqilg‘ining suvga to‘kilishinngi oldini olish uchun kema kuchini saqlashga harakat qilgan va bu muvaffaqiyatli amalga oshirilgan. Shuningdek, hodisa tufayli Suvaysh kanali yaqinida 356 ta kema to‘planib qolgan.
Usama Rabiye konteyner tashuvchi kemani sayozlikdan chiqarish ishlariga yordam bergan barcha mamlakatlarga, shu jumladan, Birlashgan Arab Amirliklari, Saudiya Arabistoni, AQSh, Xitoy, Gretsiya va Fransiyaga minnatdorchilik bildirdi.
Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemalardan iborat tirbandlik yuzaga kelgan edi, deb yozadi Bloomberg.
Kema ushbu kanal orqali harakatni butunlay to‘xtatib qo‘ygandi. Dastlab kemalar qatnaydigan yo‘lni ochishga ikki—uch kun ketishi taxmin qilingan edi. Ammo Ever Given’ni sayozlikdan chiqarib olishga urinayotgan Boskalis kompaniyasi rahbari Piter Berdovski bunga haftalab vaqt ketishi mumkinligini aytgandi.
Keyinroq Ever Given konteyner tashuvchi kemasi atrofidagi suv tubini qazish ishlari boshlandi. Kema 26-mart kuni kechqurun o‘z joyidan biroz siljitildi.
Kemalar qatnovi bo‘yicha Lloyd’s List kompaniyasi hisob-kitoblariga ko‘ra, Suvaysh kanalida sayozlikka tiqilib qolgan Ever Given konteyner tashuvchi kemasi tomonidan kemalar yo‘lining to‘sib qo‘yilishi jahon savdosiga soatiga 400 million dollarga tushayotgan edi. Misrning Ever Given bilan bog‘liq vaziyatdan ko‘rayotgan talafoti kuniga 14 million dollarga baholangandi.
Avvalroq Misr prezidenti Abdul as-Sisi konteyner kemasini yuklardan bo‘shatishga tayyorgarlik ko‘rishni boshlashni buyurgan, kemadan yuklarni tushirish 30-mart kuni boshlanishi mumkinligi aytilgan edi.
Izoh (0)