Slovakiya bosh vaziri Igor Matovich “Oddiy xalq” partiyasidagi safdoshi, moliya vaziri Eduard Xegerga lavozim almashishni taklif qildi. Bunga sabab qilib Matovich mamlakatda Rossiyaning “Sputnik V” vaksinasidan foydalanishga ruxsat berganidan keyin hukumatda paydo bo‘lgan ziddiyatlarini hal qilish ko‘rsatilmoqda, deb yozadi “RBK”.
Xabarga ko‘ra, 28-mart kuni o‘tkazilgan matbuot anjumanida Matovich iste’foga chiqish uchun hukmron Slovakiya koalitsiyasining boshqa a’zolari talab qilgan barcha variantlarni rad etib, Moliya vazirligi rahbari bilan “o‘rin almashish”ni taklif qildi. Ushbu rejaga muvofiq, Xeger hukumatni boshqaradi, Matovich esa moliya vaziri o‘rnini egallaydi.
Bosh vazir, shuningdek, bundan keyin bosh vazir o‘rinbosari Rixard Sulik, adliya vaziri Mariya Kolikova va parlament spikeri o‘rinbosari Yuray Sheligning iste’fosini talab qilmasligini aytdi.
Xeger hukumatni boshqarishga tayyorligini ma’lum qilgan. U Sulikning “Ozodlik va birdamlik” partiyasidan yordam so‘rashga, so‘ng Slovakiya prezidenti Zuzana Chaputova bilan uchrashib, keyingi harakatlar to‘g‘risida kelishib olishga va’da bergan. Koalitsiyaning “Xalq uchun” partiyasi yetakchisi Veronika Remishova allaqachon Xegerga ishonch bildirgan va Matovichning taklifi hukmron koalitsiyaga yangi imkoniyat berganini aytgan.
Eslatib o‘tamiz, Slovakiya Yevropa Ittifoqida “Sputnik V”ni Yevropa dori-darmon agentligi (EMA) ma’qullashidan oldin tasdiqlagan Vengriyadan keyingi ikkinchi mamlakatga aylangandi. “Sputnik V”ga buyurtma berish Slovakiyaning hukmron koalitsiyasida tortishuvlarga sabab bo‘ldi. Koalitsiyadagi to‘rtta partiyadan ikkitasi EMA’ning ruxsatini kutishni talab qildi. Ular Slovakiya sog‘liqni saqlash vaziri Marek Kraychi va bosh vazir Matovichning iste’fosini talab qilib, ularga koalitsiyadan chiqib ketish bilan tahdid qildi. Kraychi hukumatdagi mojarolar sababli iste’foga chiqdi. Muhokamalardan so‘ng koalitsiya a’zolari faqat Kraychining iste’fosi yetarli bo‘lishiga e’tiroz bildirdi.
Remishova mavjud vaziyatdan chiqishning ikki yo‘lini ko‘rayotganini aytdi: muddatidan oldin parlament saylovlarini o‘tkazish yoki Matovich va Sulikning zudlik bilan iste’foga chiqishi. Sulikning o‘zi esa faqat bosh vazir o‘z lavozimidan ketgan taqdirda, “Erkinlik va birdamlik” partiyasi hukumat tarkibida qolishini aytdi.
21-mart kuni Matovich parlamentning Sog‘liqni saqlash qo‘mitasi rahbari Yana Bitto-Ziganikova, shuningdek, Kolikova va Sheliga ham o‘z lavozimlarini tark etsagina, iste’foga chiqishga tayyorligini e’lon qildi. Shu bilan birga, Matovich koalitsiyadagi safdoshlarining Rossiya vaksinasi importidan “koalitsiya inqirozini keltirib chiqarish” maqsadida foydalanganini ta’kidladi.
Avvalroq Slovakiya bosh vaziri Matovich koronavirusga qarshi “Sputnik V” vaksinasi evaziga Rossiyaga Ukrainaning Zakarpatye viloyatini bermoqchiligini aytib, hazil qilgandi. Ukraina tashqi ishlar vazirligi Matovichdan aytgan so‘zlari uchun rasmiy ravishda kechirim so‘rashni talab qildi. Matovich “noo‘rin gapi” uchun “barcha ukrainaliklardan” kechirim so‘ragan.
Izoh (0)