Turkmanistonda 28-mart kuni birinchi marta parlamentning yuqori palatasi — Xalq Maslahati uchun saylovlar bo‘lib o‘tdi. Bu haqda Turkmaniston davlat axborot agentligiga tayanib, “Xronika Turkmenistana” xabar berdi.
Agentlikning xabar berishicha, saylov uchun ovoz berish ertalab soat 10:00 da boshlangan, 440 nafar milliy nazoratchi ( ovoz berishni kuzatish, ovozlarni sanash va natijalarni aniqlashning to‘g‘riligini tekshirish bo‘yicha referendum komissiyasi) jarayonning qonuniy kechishini kuzatgan.
Ayni paytda ovoz berish yakunlanib, viloyatlar va Ashxoboddagi saylov komissiyalari ovozlarni hisoblashni boshlagan. Xalq Maslahati palatasiga 48 kishi qabul qilinadi.
Avvalroq Saylov va referendumlar bo‘yicha markaziy komissiya 111 nafar nomzodni ro‘yxatdan o‘tkazgani haqida xabar qilingan. Nomzodlarning 16 nafari Ashxobod shahar va viloyati xalq maslahati (xalq kengashlari) tomonidan ko‘rsatilgan.
Saylov kampaniyasi 8—27 -mart kunlari bo‘lib o‘tdi. “Xronika Turkmenistana” mamlakatda saylovlar bilan bog‘liq birorta siyosiy faollik sezilmaganini ma’lum qildi.
2020-yil sentabr oyida qabul qilingan Konstitutsiyaning hozirgi ikki palatali parlament tarkibidagi o‘zgarishlarni bayon etgan yangi tahririga binoan yuqori palata 56 kishidan iborat bo‘ladi. Mahalliy xalq maslahati yig‘ilishlarida yashirin ovoz berish orqali ko‘rsatilgan nomzodlardan tashqari yana sakkiz kishi prezident tomonidan tayinlanadi.
Mamlakat hayotiga bag‘ishlangan “Buyuk yutuqlar xronikasi”ning 2019-yilda chop etilgan 13-tomida, Xalq Maslahati yig‘ilishi (o‘sha paytda u maslahatchi organ edi)da ikki palatali parlament yaratishning taklif qilinishi yilning asosiy hodisasi, deya qayd etilgan. 2021-yilda Turkmanistonda ikki palatali tizim joriy qilindi.
Ma’lumot uchun, Turkmaniston Konstitutsiyaning 2020-yilgi tahrir qilingan matni hali mamlakat Adliya vazirligi veb-saytida e’lon qilinmagan.
Izoh (0)