Xitoydan Niderlandiyaga yo‘l olgan konteynerlarni tashuvchi eng yirik kemalardan biri Ever Given 24-martga o‘tar kechasi Suvaysh kanaliga tiqilib qoldi. 400 metrlik kemani kanaldan olib chiqish harakatlari besamar ketmoqda, deb yozadi Reuters.

Foto: Reuters

Hozirda mazkur kema tufayli Osiyo va Yevropani bog‘lovchi, qolaversa yuk kemalari bilan doimiy gavjum bo‘ladigan kanal bo‘ylab har ikki yo‘nalishda ham harakatlanish to‘silib qolgan. Natijada dengiz kemalari tribandligi hosil bo‘lgan. Ta’kidlanishicha, kemalar safi Hindistongacha cho‘zilgan.

GAS dengiz xizmatlari firmasining aytishicha, kemani buksir (shatakchi kema) yordamida joyidan siljitish ishlari davom etmoqda, ammo kemaning yirik hajmi va shamol tezligi operatsiyani amalga oshirishga xalal bermoqda.

Kemalarni kuzatish dasturiy ta’minoti ko‘rsatishicha, so‘nggi bir necha soat ichida kemani suvdan tortib olish uchun bir qator buksirlar jalb qilinganiga qaramay, Ever Given o‘z joyidan “qo‘zg‘almagan”.

City A.M. nashrining xabar berishicha, kema halokati orqali kanal bo‘ylab harakatlanish to‘sib qo‘yilgandan so‘ng, neft narxi keskin ko‘tarilgan.

24-mart kuni Brent neftining narxi 5,77 foizga o‘sib, bir barrel uchun 64,3 dollarni tashkil etdi. Texas shtatidagi WTI (West Texas Intermediate ) neftining may oyi fyucherslari narxi 24 soat ichida 5,14 foizga o‘sib, bir barrel uchun 60,73 dollarni tashkil etdi. Kanalning to‘sib qo‘yilishi sababli neft yetkazib berishdagi uzlish to‘g‘risidagi xabarlardan so‘ng neft narxidagi o‘sish sezilarli darajada tezlashdi.

“Tiqilib qolgan kema kanalda bir necha kun qolib ketishi mumkin, degan xavotirda neftning narxi ko‘tarildi”, —  deydi OANDA bozorining bosh tahlilchisi Edvard Moya.

Londondagi aksiyalar narxi eng barqaror bo‘lib qolgan, chunki neft va mis narxlari o‘sishi BP, Royal Dutch Shell, Rio Tinto, Glencore va Anglo American kompaniyalari tomonidan qo‘llab-quvvatlangan.

Ma’lumot uchun, ayni paytda Suvaysh kanalida 10 million barrel neft va neft mahsulotlari ortilgan kemalar harakati to‘xtab qolgan. Suvaysh kanali jahon dengiz savdosining taxminan 10 foizini tashkil qiladi. Kanaldan kuniga taxminan 50 ta kema o‘tadi.

Turli xil taxminlarga ko‘ra, kema halokatiga noqulay ob-havo sharoiti, qum bo‘roni yoki elektr energiyasining uzilishi sabab bo‘lgan. Ayni paytda qutqaruv operatsiyasi olib borilmoqda, bu bir necha kun davom etishi mumkin. Ta’kidlanishicha, Ever Given kemasi joyidan ko‘chirilgan zahoti kanaldagi kemalar harakati tiklanadi.