Markaziy Osiyo mamlakatlarida koronavirus bilan bog‘liq so‘nggi yangiliklar — “Daryo” dayjestida.
Qozog‘iston
Qozog‘istonning Olmaota shahrida 21-martdan buyon amal qilib kelayotgan karantin cheklovlari uzaytirildi. Shahar bosh sanitar shifokori Jandarbek Bekshin tegishli qarorni imzoladi. Unga ko‘ra, 29-martdan 12-aprelgacha shaharda amal qiladigan yangi cheklovlar diniy tadbirlarni taqiqlaydi, xususan, jamoaviy namoz o‘qish, Ramazon oyida esa iftorlar o‘tkazish mumkin emas, shuningdek, dafn marosimlari va boshqa ma’rakalar ham yaqin oila a’zolari ishtirokida bo‘lib o‘tishi kerak. Bundan tashqari, maktab o‘quvchilari va talabalar ta’limning masofaviy shakliga o‘tkaziladi.Jandarbek Bekshin 26-mart kuni Olmaotada koronavirusning yanada yuqumliroq deb hisoblanuvchi “britancha” va “janubiy afrikacha” shtammlariga xos bo‘lgan mutatsiyalar aniqlanganini ma’lum qildi. “Yangi shtammlarning yuqumlilik darajasi avvalgi odatiy shtammga qaraganda 70 foizga yuqori… Aynan shu narsa so‘nggi vaqtlarda shaharda kuzatilayotgan kasallik yuqishining o‘sishiga turtki bermoqda”, — dedi u.
28-mart holatiga, bir kecha-kunduzda Qozog‘istonda 1492 kishida koronavirus aniqlangan. Olmaotada bir kun avvalgiga nisbatan (510 kishi) kamroq kasallanish holatlari (415 kishi) aniqlangan. Nur-Sultonda esa 346 kishida kasallik aniqlangan. Mamlakatda pandemiya boshidan buyon koronavirusni yuqtirganlar soni 241 873 kishiga yetgan.
Qozog‘istonda 1-fevraldan aholini koronavirusga qarshi emlash boshlandi. Mamlakat aholisi “Sputnik V” vaksinasi bilan emlanmoqda. Hozirda Rossiyaning vaksinasi Qozog‘istondagi Qarag‘anda farmatsevtika majmuasi tomonidan ishlab chiqarilmoqda.
Qirg‘iziston
Qirg‘izistonda esa hozircha cheklov choralari kiritilmaydi, ammo jamoat joylarida sanitariya qoidalari kuchaytiriladi. Xususan, fuqarolar jamoat joylarida niqob taqishi kerak. Bu haqda bosh vazir birinchi o‘rinbosari va Respublika koronavirusga qarshi kurash shtabi boshlig‘i Artyom Novikov ko‘rsatma berdi.Uning aytishicha, bundan keyingi choralar mahalliy hukumat organlari tomonidan mintaqadagi epidemiologik vaziyatdan kelib chiqib qo‘llaniladi. Mulkchilik shaklidan qat’i nazar, barcha muassasalarda, yopiq binolarda niqob taqish rejimiga so‘zsiz rioya qilinishi kerak, dedi Novikov.
Qirg‘izistonda so‘nggi kunlarda koronavirusga chalinish hollari ko‘paymoqda. Rasmiy ma’lumotlarga qaraganda, mamlakatda har kuni 100 ga yaqin holat aniqlanmoqda. Xususan, 29-mart holatiga, o‘tgan bir kecha-kunduzda Qirg‘izistonda 71 kishida COVID-19 aniqlangan, shulardan 53 nafari Bishkek fuqarolaridir. Shu tariqa, pandemiya boshidan buyon koronavirusga chalinganlar soni 88 163 kishiga yetgan.
Qayd etish joiz, bugun, 29-mart kuni Qirg‘izistonda aholini koronavirusga qarshi emlash boshlandi. Birinchi bo‘lib sog‘liqni saqlash vaziri Olimqodir Beyshenaliyev Xitoyning SinoPharm vaksinasi bilan emlandi.Tojikiston
Tojikistonda 100 nafargacha odam ishtirokida to‘ylar o‘tkazishga ruxsat berildi, ammo sanitariya va epidemiyaga qarshi choralarga rioya qilinishi shart. Bunday qaror Respublika COVID-19 infeksiyasiga qarshi kurash shtabi tomonidan mamlakatda koronavirus bilan bog‘liq sanitar-epidemiologik vaziyatning yaxshilanishi sababli qabul qilingan.
O‘tgan bir yil davomida Tojikistonda to‘ylarda ko‘pi bilan 30-40 kishini chaqirish mumkin edi. O‘tgan yilning aprelida esa to‘y marosimlarini o‘tkazish vaqtinchalik to‘xtatilgan edi. 2020-yil yoz fasli boshida esa mehmonlarning sonini cheklagan holda, faqat yaqin qarindoshlar ishtirokida 30-40 kishilik to‘ylarga ruxsat berilgandi.
Tojikistonda 22-martdan aholini koronavirusga qarshi emlash boshlandi. Davlat rahbarining vaksinatsiya bo‘yicha imzolagan farmoniga ko‘ra, mamlakat aholisini emlash aholining zaif guruhlari o‘rtasida bosqichma-bosqich amalga oshiriladi.
26-yanvar kuni Tojikiston prezidenti Emomali Rahmon o‘zining parlamentga an’anaviy yillik murojaatida mamlakatda koronavirus ustidan g‘alaba qozonilganini ma’lum qilgandi. O‘shanda 11-yanvardan buyon mamlakatda birorta ham koronavirusga chalinish holati qayd etilmagani xabar berilgandi.
O‘zbekiston
O‘zbekistonda koronavirusga chalinish bo‘yicha 2021-yilgi kunlik antirekord ketma-ket beshinchi kun yangilandi.O‘zbekistonda koronavirusga chalingani rasman tan olinganlar soni 82 536 nafarga yetdi. Sog‘liqni saqlash vazirligi ma’lumotlariga ko‘ra, 28-mart kuni mamlakatning 10 ta hududida jami 196 ta kasallanish holati aniqlangan. Bu 2021-yil hisobidan yangi antirekorddir. Bundan avvalgi eng yomon ko‘rsatkich (194 ta holat) bir kun avval — 27-mart kuni qayd etilgan edi.
Avvalroq O‘zbekistonda mart oyidan boshlab koronavirusga chalinish holatlari yana ko‘paya boshlagani munosabati bilan bir qator ta’lim muassasalari vaqtincha yopilgani yoki ta’limni masofaviy shaklga o‘tkazgani to‘g‘risida xabar berilgandi. 1-apreldan ommaviy tadbirlarni o‘tkazishga ayrim cheklovlar o‘rnatilmoqda.
O‘zbekistonda aholini koronavirusga qarshi emlash 1-apreldan boshlanadi.
Turkmaniston
Avvalroq Turkmanistonning Toshhovuz viloyatida shifokor va politsiyachilarni Xitoy vaksinasi bilan emlash boshlangani haqida xabar berilgandi. Xabarga ko‘ra, vaksinaning partiyasi 6-mart kuni mamlakatga olib kelingan. Aynan qaysi vaksinadan foydalanilganini aniqlashning iloji bo‘lmagan, chunki preparatning nomi xitoycha harflarda yozilgan.Shuningdek, xabarlarga ko‘ra, Turkmaniston poytaxti Ashxobodda aholini emlash 12-martdan boshlangan. Buning uchun Turkmanistonda ro‘yxatdan o‘tkazilmagan Xitoy vaksinasi — Vero Cell qo‘llanilmoqda. Lebap viloyatida esa sog‘liqni saqlash sohasi xodimlarining qariyb 80 foizi koronavirusga qarshi emlangan.
Izoh (0)