Миср президенти Абдул-Фаттоҳ ас-Сиси Ever Given кемасининг саёзликка тиқилиб қолиши оқибатида тўсиб қўйилган Сувайш каналини блокдан чиқариш ишлари муваффақиятли якунланганини эълон қилди. Канал бўйлаб кемалар қатновини уч ярим кун ичида тўлиқ тиклаш режалаштирилмоқда, деб ёзади «РБК».
«Бугун мисрликлар турли жабҳалардаги катта техник қийинчиликларга қарамай, Сувайш каналидаги инқирозни тугатишга муваффақ бўлди. Мисрликларнинг қўллари билан ишларни нормал ҳолатга қайтариш натижасида бутун дунё ўз товар ва эҳтиёжларини ушбу бўйлама кемалар қатнов йўли орқали ўтказишда давом этиши мумкин», — деди президент.
Сувайш канали маъмурияти раҳбари Усама Рабийенинг айтишича, кемаларнинг канал орқали нормал ҳаракатини тиклаш учун уч ярим кун керак бўлади. Унинг таъкидлашича, Ever Given тўлиқ ишга туширилгандан сўнг кема техник кўрик учун Буюк кўллар минтақасига юборилади, шундан кейин канал бўйлаб кемалар ҳаракати қайта тикланади. «Ҳодиса оқибатида навбатда туриб қолган барча кемаларни ўтказиб юбориш ва тирбандликни тугатиш учун канал суткасига 24 соат ишлайди», — дея қўшимча қилди у.
Рабийенинг сўзларига кўра, Ever Given’ни тортиб олиш жараёнида мутахассислар кемадаги ёқилғининг сувга тўкилишиннги олдини олиш учун кема кучини сақлашга ҳаракат қилган ва бу муваффақиятли амалга оширилган. Шунингдек, ҳодиса туфайли Сувайш канали яқинида 356 та кема тўпланиб қолган.
Усама Рабийе контейнер ташувчи кемани саёзликдан чиқариш ишларига ёрдам берган барча мамлакатларга, шу жумладан, Бирлашган Араб Амирликлари, Саудия Арабистони, АҚШ, Хитой, Греция ва Францияга миннатдорчилик билдирди.
Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемалардан иборат тирбандлик юзага келган эди, деб ёзади Bloomberg.
Кема ушбу канал орқали ҳаракатни бутунлай тўхтатиб қўйганди. Дастлаб кемалар қатнайдиган йўлни очишга икки—уч кун кетиши тахмин қилинган эди. Аммо Ever Given’ни саёзликдан чиқариб олишга уринаётган Boskalis компанияси раҳбари Питер Бердовски бунга ҳафталаб вақт кетиши мумкинлигини айтганди.
Кейинроқ Ever Given контейнер ташувчи кемаси атрофидаги сув тубини қазиш ишлари бошланди. Кема 26 март куни кечқурун ўз жойидан бир оз силжитилди.
Кемалар қатнови бўйича Lloyd’s List компанияси ҳисоб-китобларига кўра, Сувайш каналида саёзликка тиқилиб қолган Ever Given контейнер ташувчи кемаси томонидан кемалар йўлининг тўсиб қўйилиши жаҳон савдосига соатига 400 миллион долларга тушаётган эди. Мисрнинг Ever Given билан боғлиқ вазиятдан кўраётган талафоти кунига 14 миллион долларга баҳоланганди.
Аввалроқ Миср президенти Абдул ас-Сиси контейнер кемасини юклардан бўшатишга тайёргарлик кўришни бошлашни буюрган, кемадан юкларни тушириш 30 март куни бошланиши мумкинлиги айтилган эди.
Изоҳ (0)