Qirg‘iziston sog‘liqni saqlash va ijtimoiy rivojlanish vaziri Alimqodir Beyshenaliyev 29-mart kuni mamlakatda birinchi bo‘lib COVID-19’ga vaksina qabul qildi. Vazir Xitoyning SinoPharm vaksinasi bilan emlandi, deb yozadi Kloop.
“Men ukoldan qo‘rqaman”, — degan vazir emlanishidan oldin jurnalistlarga. Shuningdek, vazir o‘zidan keyin o‘rinbosarlari emlanishi haqida ma’lum qilgan.
Qirg‘izistonda 29-mart kuni koronavirusga qarshi Xitoyning SinoPharm vaksinasi bilan ommaviy emlashning birinchi bosqichi boshlandi.
Mamlakat 19-mart kuni COVID-19’ga qarshi Xitoyning SinoPharm vaksinasi partiyasini qabul qilib olgan. Umumiy hisobda, mamlakat 150 ming doza vaksinani bepul oldi. Ushbu miqdordagi vaksina 75 ming kishiga yetadi. Har bir kishiga vaksina dozasi ikki marta, 25—28 kun oralig‘ida yuboriladi.
Bundan tashqari, Beyshenaliyev Qirg‘izistonga yozning boshida Rossiyaning 500 ming dozali “Sputnik V” vaksinasi kelishi kutilayotganini aytdi.
Mamlakatda vaksinatsiya uch bosqichda amalga oshirilib, dastlabki bosqich Bishkek, O‘sh va Chuy viloyatida boshlanadi.Birinchi bosqichda tibbiyot xodimlari, ta’lim muassasalari xodimlari, huquq-tartibot organlari xodimlari va xavfsizlik kuchlarini emlash rejalashtirilgan. Ikkinchi bosqichda klinik xavf omillariga ega kishilar, surunkali kasalliklarga chalinganlar, aholining ijtimoiy zaif guruhlari, shuningdek, 60 yoshdan oshganlarga vaksina beriladi. Qolganlar faqat uchinchi bosqichda emlanadi.
SinoPharm vaksinasi — faollashtirilmagan (o‘ldirilgan) vaksina. Preparatni yaratishda patogen virus yoki bakteriya yoki bo‘lmasa ularga nihoyatda o‘xshash mikroorganizmlardan foydalaniladi, ular kimyoviy reagentlar, issiqlik yordamida o‘ldiriladi.
Sog‘liqni saqlash vazirligining ma’lumotlariga ko‘ra, SinoPharm preparati yordamida Xitoy, BAA, Turkiya, O‘zbekiston singari 65 mamlakatda 12 milliondan ortiq odam emlagan. Shuningdek, SinoPharm vaksinasi bilan emlashdan keyin hech qanday ikkilamchi ta’sirlar qayd etilmagan.
Ma’lumot uchun, SinoPharm vaksinasi Xitoyda 2020-yil dekabr oyida ro‘yxatdan o‘tkazildi va koronavirusga qarshi qo‘llash uchun tasdiqlangan birinchi Xitoy vaksinasiga aylandi. Preparatning samaradorligi 79 foiz ekani haqida xabar berilgan.
Izoh (0)