Avstraliya bosh prokurori va mudofaa vaziri zo‘rlashga oid mojarolar tufayli iste’foga chiqdi

Avstraliya bosh prokurori va mudofaa vaziri zo‘rlashga oid bir qator ayblovlar tufayli iste’foga chiqdi, deb yozadi Reuters.

Xabarga ko‘ra, Avstraliya bosh vaziri Skott Morrison bosh prokuror Kristian Porter va mudofaa vaziri Linda Reynoldsni o‘z lavozimlaridan chetlashtirdi.

Ta’kidlanishicha, 2020-yil yozda politsiyaga kiritilgan anonim ariza yuzasidan Porter 16 yoshli qizni zo‘rlaganlikda ayblangan. Arizada aytilishicha, 1988-yilda 17 yoshda bo‘lgan Porter, o‘zi bilan debatda ishtirok etgan 16 yoshli qizni zo‘rlagan. Porterning o‘zi ayblovlarni rad etgan.

Linda Reynolds ikki yil oldin yuqori lavozimli hamkasbi tomonidan idorada zo‘rlanganini da’vo qilgan yosh xodimaga yetarlicha ko‘mak bermagani uchun qattiq tanqidga olindi. Yosh xodimani “yolg‘onchi sigir” deb atagan Reynolds kechirim so‘rashga majbur bo‘ldi.

Vazirlar Mahkamasidagi o‘zgarishlarga muvofiq, Mikaeliya Kesh yangi bosh prokuror, Piter Datton mudofaa vaziri bo‘ladi. O‘z navbatida, Kristian Porter sanoat vaziri lavozimiga o‘tkaziladi, Reynolds esa davlat xizmatlari vaziri sifatida faoliyatini davom ettiradi.

Shu bilan birga Avstraliyada Vazirlar Mahkamasining ayollar tengligi, xavfsizligi, iqtisodiy xavfsizligi, salomatligi va farovonligini ta’minlashga qaratilgan yangi ishchi guruhi tuzilgani e’lon qilindi.

Bosh vazirning so‘zlariga ko‘ra, mazkur o‘zgartirishlar Vazirlar Mahkamasi tarixida birinchi bor ayollarning eng katta vakolatga ega bo‘lganidan dalolat beradi.

“Bu nafaqat idorada ayollar o‘rnini kengaytirish balki, ko‘nikma va tajriba, shuningdek, mamlakatimizdagi eng qiyin muammolarni hal qilishga yordam beradigan istiqbol va hamkorlikdir” — dedi Morrison.