AQSh prezidenti Jo Bayden Rossiya davlat rahbari Vladimir Putinni 22—23-aprel kunlari bo‘lib o‘tadigan va 40 nafar dunyo yetakchisi ishtirok etadigan iqlim o‘zgarishlariga bag‘ishlangan onlayn-formatdagi uchrashuvga taklif qildi. Bu haqda “RIA Novosti” xabar berdi.
Bayden jurnalistlar bilan suhbatda iqlim o‘zgarishlari muhokama qilinadigan navbatdagi sammitga taklif qilinganlar qatorida Rossiy prezidenti va Xitoy rahbari ham borligini ma’lum qilgan. AQSh prezidenti ularning ushbu taklifdan xabardorligi, biroq bu borada ikki davlat rahbarlari bilan shaxsan suhbatlashmaganini aytgan.
Oq uy e’lon qilgan ro‘yxatga ko‘ra, sammitga Rossiya, Xitoy, Buyuk Britaniya, Hindiston, Turkiya va Yaponiya davlatlarining rahbarlari taklif etilgan.
Vashington onlayn translyatsiya qilinadigan sammitda iqlim o‘zgarishlari bo‘yicha jahon hamjamiyatini qiynayotgan, tezkor ravishda hal etilishi taqozo qilinadigan muammolar, iqtisodiy tarafdan foyda keltirishi mumkin bo‘lgan tashabbuslar muhokama qilinishini ma’lum qilgan.
Avvalroq AQSh prezidenti Jo Bayden ABC telekanaliga bergan intervyusida “Rossiya prezidenti Vladimir Putinni qotil deb hisoblaysizmi?” — degan savolga tasdiq javobini bergan. Kreml esa Jo Baydenning Vladimir Putin haqidagi bayonotlarini “juda yomon” deb hisoblashini bildirdi. O‘z navbatida, Putin AQSh davlat rahbari Jo Baydenga to‘g‘ridan to‘g‘ri efir orqali muloqot qilishni taklif etdi. Jo Bayden Rossiya prezidenti bilan ochiq muhokamaga rozilik berish-bermasligi haqidagi savolni e’tiborsiz qoldirdi.
Keyinchalik Turkiya prezidenti Rajab Toyyib Erdo‘g‘on amerikalik hamkasbi Jo Baydenning Rossiya yetakchisi Vladimir Putin haqidagi gaplarini qoralagan. Kanada bosh vaziri Jastin Tryudo esa SiriusXM radiostansiyasiga bergan intervyusida Putin uchun G‘arbning u haqdagi fikri qiziq emasligini qayd etgan.
Izoh (0)