Shimoliy Koreya tomonidan ballistik raketalarning uchirilishi AQSh va Yaponiyaning doimiy tahdidlari oldida o‘zini himoya qilish bo‘lgan. Bu haqda Koreya Mehnat partiyasi markaziy qo‘mitasi kotibi Li Ben Chxolning bayonotiga asoslanib, “RBK” xabar berdi.
“Yaqinda amalga oshirilgan yangi boshqariluvchi taktik raketalarning sinovdan o‘tkazilishi suveren davlatning o‘zini o‘zi himoya qilish bo‘yicha umumbashariy huquqidan foydalanishga teng harakat bo‘ldi” — dedi qo‘mita kotibi.
Xabarga ko‘ra, Li Ben Chxol Vashington va Seulning harakatlarini qoralagan. “Janubiy Koreya va AQSh tizimli ravishda xavfli harbiy mashg‘ulotlar olib borish va zamonaviy qurol turlarini joriy qilish bilan Koreya yarim oroliga munatazam harbiy tahdid solib kelmoqda”, — dedi u. Qo‘mita kotibi AQSh Davlat departamentining raketa uchirilishidan keyingi bayonotini ig‘vogarlik deb atadi.
“AQSh prezidentining bunday bayonotlari davlatimizning o‘zini himoya qilish huquqiga ochiqdan ochiq tajovuz va provokatsiya”, — deya qo‘shimcha qildi u.
Eslatib o‘tamiz, 25-mart kuni Shimoliy Koreya ikkita taktik raketaning muvaffaqiyatli sinovlari haqida ma’lum qilgan. Koreyalik harbiylar xabariga ko‘ra, ikkala raketa ham KXDR sharqiy qirg‘oqlaridan 60 kilometr masofada joylashgan nishonga muvaffaqiyatli borib tekkan.
KXDR Yapon dengiziga qarata ikkita ballistik raketani uchirdi. Raketa sinovlari haqida Yaponiya Mudofaa vazirligi va Janubiy Koreya harbiylari ma’lum qilgan. Bungacha esa AQSh harbiylari Pxenyan tez orada ballistik raketalar uchirishni qayta boshlashi haqida ogohlantirgan edi.
Kyodo agentligining xabar berishicha, Yaponiya bosh vaziri Yosixide Suga Shimoliy Koreyaning ballistik raketa uchirishi munosabati bilan Milliy xavfsizlik kengashi majlisini chaqirgan.Yaponiya Mudofaa vazirligi raketa uchirilishini “butun xalqaro hamjamiyat, shu jumladan, Yaponiya uchun jiddiy muammo” deb atagan.
“TASS” agentligining xabar berishicha, raketa uchirilgani munosabati bilan 30-mart kuni BMT Xavfsizlik Kengashi navbatdan tashqari kengash o‘tkazadi. Agentlik ma’lumotlariga Fransiya tomonidan iltimos qilingan mazkur kengash yopiq shaklda o‘tkaziladi.
Avvalroq Shimoliy Koreyaning qanotli raketalarni sinovdan o‘tkazgani haqida xabar berilgandi. Xabarga ko‘ra, Sariq dengiz mintaqasidan ikkita raketa uchirilgan.
The Washington Post gazetasining xabar berishicha, AQSh Mudofaa vazirligi vakillari razvedka ma’lumotlari Shimoliy Koreyaning raketa sinovlarini rejalashtirayotgani haqida ogohlantirgan edi.
Gazetaning yozishicha, xabar qilinmagan raketa sinovlari KXDR yetakchisi Kim Chen Inning AQSh prezidenti Jo Baydenga bo‘lgan birinchi to‘g‘ridan to‘g‘ri da’vosini anglatadi.
Shu bilan birga, AQSh ma’muriyati Shimoliy Koreya o‘tkazgan qisqa masofaga uchadigan raketalarning sinovini keng ko‘lamli provokatsiya deb hisoblamagan. Ma’muriyat vakillaridan biri amalga oshirilgan sinovlar BMT Xavfsizlik Kengashining KXDR to‘g‘risidagi qarorlariga zid emasligini qo‘shimcha qilgan va ularni “normal harbiy faoliyat” deb atagan.
Izoh (0)