Yaponiya poytaxti Tokio yaqinidagi Narita aeroportida COVID-19’ga topshirgan testi ijobiy chiqqani tufayli karantinga olingan ayol vafot etdi. Bu karantin markazida sodir bo‘lgan birinchi o‘lim holati, deb yozmoqda mamlakat Sog‘liqni saqlash vazirligiga tayanib, “RIA Novosti”.
Xirosima prefekturasida yashovchi ayol Misrdan uchib kelgan. Samolyotdan tushgach, ayolning COVID-19’ga topshirgan testi ijobiy natijani ko‘rsatgan, shu sababli u aeroportda karantinga olingan.
Xabarga ko‘ra, undagi kasallik simptomlarsiz kechgan, ammo 27-mart, shanba kuni ertalab, sog‘liqni saqlash xodimlarining kundalik tekshiruvi paytida ayol telefonga javob bermagan. Shundan so‘ng uning xonasiga kelgan tibbiyot xodimlari ayolni o‘lik holda topgan. Ta’kidlanishicha, Yaponiyada avval bunday holat kuzatilmagan.
Avvalroq Yaponiyada tibbiyot xodimlari Filippindan kelgan erkakda koronavirusning yangi shtammini aniqlagan. Mamlakat Sog‘liqni saqlash, mehnat va farovonlik vazirligining xabar berishicha, 60 yoshli erkak Filippindan 25-fevral kuni Tokio yaqinidagi Narita xalqaro aeroportiga kelgan. Undagi kasallik simptomlarsiz kechgan.
Shuningdek, Yaponiyada muzlatkich nosozligi sabab koronavirus vaksinasining 1000 dan ortiq dozasi yaroqsiz holga kelgani haqida xabar berilgandi. Ma’lumotlarga ko‘ra, -80 dan -60 darajagacha sovuqda saqlanishi kerak bo‘lgan Pfizer va BioNTech kompaniyasining vaksinasi muzlatkichdagi nosozlik sababli yaroqsiz holga kelgan.
Izoh (0)