АҚШ президенти Жо Байден Россия давлат раҳбари Владимир Путинни 22—23 апрель кунлари бўлиб ўтадиган ва 40 нафар дунё етакчиси иштирок этадиган иқлим ўзгаришларига бағишланган онлайн-форматдаги учрашувга таклиф қилди. Бу ҳақда «РИА Новости» хабар берди.
Байден журналистлар билан суҳбатда иқлим ўзгаришлари муҳокама қилинадиган навбатдаги саммитга таклиф қилинганлар қаторида Россий президенти ва Хитой раҳбари ҳам борлигини маълум қилган. АҚШ президенти уларнинг ушбу таклифдан хабардорлиги, бироқ бу борада икки давлат раҳбарлари билан шахсан суҳбатлашмаганини айтган.
Оқ уй эълон қилган рўйхатга кўра, саммитга Россия, Хитой, Буюк Британия, Ҳиндистон, Туркия ва Япония давлатларининг раҳбарлари таклиф этилган.
Вашингтон онлайн трансляция қилинадиган саммитда иқлим ўзгаришлари бўйича жаҳон ҳамжамиятини қийнаётган, тезкор равишда ҳал этилиши тақозо қилинадиган муаммолар, иқтисодий тарафдан фойда келтириши мумкин бўлган ташаббуслар муҳокама қилинишини маълум қилган.
Аввалроқ АҚШ президенти Жо Байден ABC телеканалига берган интервьюсида «Россия президенти Владимир Путинни қотил деб ҳисоблайсизми?» — деган саволга тасдиқ жавобини берган. Кремль эса Жо Байденнинг Владимир Путин ҳақидаги баёнотларини «жуда ёмон» деб ҳисоблашини билдирди. Ўз навбатида, Путин АҚШ давлат раҳбари Жо Байденга тўғридан-тўғри эфир орқали мулоқот қилишни таклиф этди. Жо Байден Россия президенти билан очиқ муҳокамага розилик бериш-бермаслиги ҳақидаги саволни эътиборсиз қолдирди.
Кейинчалик Туркия президенти Ражаб Тоййиб Эрдўғон америкалик ҳамкасби Жо Байденнинг Россия етакчиси Владимир Путин ҳақидаги гапларини қоралаган. Канада бош вазири Жастин Трюдо эса SiriusXM радиостанциясига берган интервьюсида Путин учун Ғарбнинг у ҳақдаги фикри қизиқ эмаслигини қайд этган.
Изоҳ (0)