Ispaniyada narkotiklarni tashishga mo‘ljallangan suvosti kemasi ushlandi

Ispaniya politsiyasi 2 tonnagacha narkotiklarni tashiy oladigan qo‘lbola suvosti kemasini ushladi, deb yozadi “Interfaks”.

9 metrli submarina Malaga shahrida aniqlangan. Huquq-tartibot organlari talqiniga ko‘ra, yupqa taxta va shisha toladan yasalgan qo‘lbola suvosti kemasi narkotiklarni tashish uchun mo‘ljallangan, ammo hozircha bu maqsadda qo‘llanilmagan.

U yana besh mamlakat va Yevropol vakillari ishtirokidagi katta ko‘lamli operatsiya natijasida topilgan.

Politsiya ma’lumotlariga ko‘ra, butun Ispaniya bo‘ylab reydlar chog‘ida 52 kishi qo‘lga olingan. Kokain va gashishdan iborat yuk aniqlangan, shuningdek, narkolaboratoriya fosh etilgan.

BBC eslatishicha, 2019-yilda Ispaniya shimoli-g‘arbida bortida 2 tonna kokain bo‘lgan suvosti kemasi tutilgan. Yuk Kolumbiyadan kelgani taxmin qilingan, politsiya kema kokain bilan shuncha masofani bosib o‘tganini tekshirishga kirishgan.

Avvalroq Yevropa mafiyasining eng ko‘p qidirilayotgan boshliqlaridan biri Ispaniyada hibsga olingan edi. 35 yoshli Juzeppe Romeo Yevropaga kokain yetkazib berishda muhim rol o‘ynagan. Narkotik savdosi bilan shug‘ullangani uchun mafiya sardori 20 yilga ozodlikdan mahrum qilindi. Italiya tashqi ishlar vaziri Luchano Lamorjezening ta’kidlashicha, jinoyatchining qo‘lga olinishi Yevropaga eng yirik kokain yetkazib beruvchisi hisoblanuvchi Ndrangeta mafiyasiga jiddiy zarba bo‘ldi.