Turkiyada “xavfsiz turizm dasturi” doirasida turizm xodimlarini koronavirusga qarshi rejadan tashqari bepul emlash boshlandi, deb xabar bermoqda Turkiyaning O‘zbekistondagi elchixonasi matbuot xizmati.
“Xavfsiz turizm sertifikati dasturi” yaqinlashib kelayotgan sayyohlik mavsumida chet ellik sayyohlarni kutib olish hamda soha vakillari va tub aholining salomatligini ta’minlash uchun ishlab chiqilgan.
“Vaksina olish uchun maxsus ro‘yxatdan o‘tish tizimiga murojaat qilish mumkin”, — deyiladi vazirlik xabarida.
Aniqlik kiritilishicha, xizmatdan vazirlik tomonidan sertifikatlangan joylashuv obyektlari, oziq-ovqat va ichimliklar ishlab chiqaruvchi korxonalar, sayyohlik agentliklari xodimlari, gidlar va sayyohlik transporti haydovchilari foydalanishi mumkin.
Sayyohlik korxonalari uchun maxsus tizim yaratilgan bo‘lib, ular u yerga vaksinatsiya uchun o‘z xodimlari ma’lumotlarini kiritadi.
COVID-19 ga qarshi kurashish va dunyoning eng xavfsiz yo‘nalishlaridan biri sifatida o‘z mavqeyini yanada oshirish bo‘yicha davomli sa’y-harakatlar doirasida, Turkiya dunyo bo‘yicha sohadagi eng birinchi va eng muvaffaqiyatli misollardan bir bo‘lgan “Xavfsiz turizm sertifikati dasturi”ga sarmoya kiritishda davom etmoqda. Mamlakat o‘z amaliyot doirasini kengaytirdi hamda 30 va undan ortiq xonali turar-joy inshootlari uchun amaliyot majburiy etib belgilandi. Hozirga qadar 8 000 dan ortiq inshootlar sertifikatlangan.
Bundan tashqari, Turkiyada 15-apreldan sayyohlar uchun PZR-testlarni bekor qilish rejalashtirilmoqda, ammo bu mamlakatdagi epidemiologik vaziyatga bog‘liq bo‘ladi. Hozircha respublika hukumati yirik shaharlarda va aholi zich joylashgan ba’zi viloyatlarda, shu jumladan, Antaliya va Bodrumda cheklov choralarini bekor qilmoqchi emas.
Avvalroq Turkiya hukumati mamlakatga kelayotgan sayyohlardan koronavirus uchun manfiy natijali test ma’lumotnomasini talab qilish muddatini 26-martga qadar uzaytirgani xabar berilgan edi. Shuningdek, Turkiyaga bormoqchi bo‘lgan fuqarolarga 15-martdan majburiy elektron so‘rovnoma joriy qilinishi ham ma’lum qilindi.
Izoh (0)