AQShda El Chapo laqabli meksikalik narkobaron Xoakin Gusman Loeraning rafiqasi Emma Koronel Ayspuro hibsga olindi. Ayol 24-fevral, chorshanba kuni Kolumbiya okrug sudiga olib boriladi. Bu haqda mamlakat Adliya vazirligi veb-saytidagi ma’lumotga tayanib “RBK” xabar berdi.

Emma Koronel Ayspuro.

Foto: Reuters

Adliya vazirligining ma’lumotiga ko‘ra, Ayspuro kokain, metamfetamin, geroin va marixuana moddalarini AQShga import qilish yuzasidan til biriktirishda ishtirok etganlikda ayblanmoqda. Bundan tashqari, ayol 2015-yil iyul oyida Gusmanga Meksikaning Altiplano qamoqxonasidan qochishga yordam berganlikda gumon qilinmoqda.

“2016-yil yanvar oyida El Chapo Meksikada qayta hibsga olingach, rafiqasi yana bir qochishni rejalashtirishda ishtirok etgan”, — deya ta’kidladi tergovchilar.

Gusman — “Sinaloa” giyohvand moddalar kartelining rahbari. 2014-yil fevraligacha AQSh Adliya vazirligi uni dunyodagi eng qudratli narkobaron deb atagan. Narkobaron ikki marta qamoqdan qochishga muvaffaq bo‘lgan. Birinchi safar u Gvatemala hukumati tomonidan 1993-yilda hibsga olinib, Meksikaga ekstraditsiya qilingan edi. U yerda sud narkobaronni 20 yilga ozodlikdan mahrum qildi. Ammo 2001-yili narkobaron soqchilarning barchasini sotib olib, qamoqdan qochib ketdi.

Unga 2014-yilda ikkinchi bor hukm o‘qilgan. O‘shanda narkobaron maxsus qo‘riqlanadigan qamoqxonaga joylashtirilgan edi. Ammo 2015-yil iyul oyida u yerdan qochib qutulgan: uning kamerasi ostida bir yarim kilometrlik yerosti yo‘li topilgan.

2016-yil yanvar oyida Gusman yana Meksika hukumati tomonidan hibsga olindi. El Chapo u yerda tushkunlikda ekanini bildirganida, buni yengish uchun qamoqxona rahbariyati unga Migel de Servantesning “Don Kixot” kitobini berdi. Bir yil o‘tgach esa u AQShga ekstraditsiya qilindi. Qo‘shma Shtatlar 2019-yil iyul oyida narkobaronni umrbod qamoq jazosiga mahkum etdi va yana 30 yilga ozodlikdan mahrum qildi.