AQSh qariyb bir oydan buyon Shimoliy Koreya bilan turli diplomatik kanallar orqali bog‘lana olmayapti. Bu haqda Reuters prezident Jo Bayden ma’muriyatidagi yuqori mansabli amaldorga tayanib ma’lum qildi, deb yozadi “RBK”.
Uning so‘zlariga ko‘ra, Oq uy fevral o‘rtalaridan buyon bir nechta diplomatik kanallar, shu jumladan, Nyu-Yorkdagi kanallar orqali Pxenyan bilan bog‘lanishga urinib kelgan. Ammo Shimoliy Koreya rahbariyati bu urinishlarni e’tiborsiz qoldirgan.
“Bugungi kungacha biz Pxenyandan javob olganimiz yo‘q”, — dedi agentlik hamsuhbati.
Reuters ma’lumotlariga ko‘ra, Bayden ma’muriyati KXDR bilan Shimoliy Koreya yadro dasturini muhokama qilish uchun bog‘lanishga harakat qilyapti. Pxenyanning sukut saqlashi AQSh davlat kotibi Entoni Blinken va Pentagon rahbari Lloyd Ostinning Janubiy Koreya va Yaponiyaga bo‘lg‘usi safari fonida ham tashvishni kuchaytirmoqda. Tashrif kelasi haftaga rejalashtirilgan.
Prezident ma’muriyati vakili mamlakatlar o‘rtasida muloqotning yo‘qligi Oq uyning KXDRga nisbatan siyosatiga qanday ta’sir o‘tkazishi yuzasidan izoh berishdan bosh tortdi. Yaqin haftalarda Vashington Pxenyan bilan hamkorlikning asosiy jihatlarini tasdiqlashi kerak.
Agentlik manbasiga ko‘ra, AQSh va Shimoliy Koreya o‘rtasida faol muloqot olib borilmayotganiga bir yildan oshgan.
Saylovoldi kampaniyasi chog‘ida Bayden bir necha marta Shimoliy Koreya yetakchisi Kim Chen Inga nisbatan salbiy fikr bildirgan. 2020-yil oktabrida Tramp bilan o‘tkazilgan munozaralarda u KXDR rahbarini “bosqinchi” deb atagan. Ungacha, 2019-yilda Filadelfiyada saylovchilari oldida nutq so‘zlar ekan, bo‘lg‘usi AQSh prezidenti Kim Chen In diktator va tiran ekanini aytgan, Nyu-Gempshirda esa uni qotil deb atagan edi.
2021-yil yanvarida Kim Chen In Shimoliy Koreya Mehnat partiyasining VIII syezdida AQSh KXDRning asosiy dushmani bo‘lib qolishini ma’lum qilgan. “Bizning tashqi siyosiy faoliyatimiz kelajakda inqilobiy rivojlanishimiz yo‘lidagi asosiy to‘siq va eng katta dushman bo‘lgan AQShni yo‘q qilish va bo‘ysundirishga qaratilishi kerak”, — degan edi u. Shu bilan birga, agar Oq uy o‘zining dushmanlarcha siyosatidan voz kechsa, Pxenyan Vashington bilan munosabatlarni normallashtirishga tayyor.
Mavzuga doir:
Izoh (0)