O‘zbekistonda Rossiyaning koronavirusga qarshi “Sputnik V” vaksinasini ro‘yxatdan o‘tkazish jarayoni davom etmoqda. Bu haqda Sog‘liqni saqlash vazirligi huzuridagi Farmatsevtika tarmog‘ini rivojlantirish agentligiga tayanib, “Podrobno” xabar berdi. Biroq ro‘yxatga olish jarayoni qachon yakunlanishi hozircha noma’lum.
“Oldinroq xabar berganimizdek, vaksina sertifikatsiyadan o‘tdi. Hozirda uni ro‘yxatdan o‘tkazish jarayoni davom etmoqda. U yakunlangandan so‘ng biror-bir yangilik kutish mumkin bo‘ladi”, — deydi agentlik matbuot xizmati.
O‘zbekistonda vaksinalardan boshqa dori vositalari qatori tibbiy amaliyotda faqatgina davlat tomonidan ro‘yxatga olingach, foydalanishga ruxsat beriladi. Bugungi kunda respublikada koronavirusga qarshi ro‘yxatga olingan yagona vaksina — O‘zbekiston-Xitoy sherikchiligida yaratilgan ZF-UZ-VAC2001 hisoblanadi.
Gamaleya markazida ishlab chiqariladigan “Sputnik V” vaksinasi aholini koronavirusga qarshi emlash uchun qo‘llaniladi. 2020-yil avgust oyida ushbu preparat COVID-19’ga qarshi qo‘llash uchun dunyoda birinchi bo‘lib ro‘yxatdan o‘tkazilgan.
Ma’lumot uchun, “Sputnik V” vaksinasi Vengriya, Livan, Serb Respublikasi, Jazoir, Argentina, Belarus, Boliviya, BAA, Serbiya, Paragvay, Venesuela, Mo‘g‘uliston, Pokiston, Turkmaniston, Falastin, Gonduras, Nikaragua va Eron va boshqa bir qator mamlakatlarda foydalanish uchun tasdiqlangan.
Eslatib o‘tamiz O‘zbekiston ushbu vaksinani ishlab chiqarishda Xitoy kompaniyasi bilan hammuallif hisoblanadi. Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlagan.Avvalroq O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan. Maxsus komissiya qaroriga ko‘ra, O‘zbekistonda Rossiyaning Gamaleya ilmiy-tadqiqot markazi tomonidan ishlab chiqilgan “Sputnik V” vaksinasini qo‘llashga ruxsat berildi. Koronavirusga qarshi kurashish tadbirlari va vaksina uchun 3 trillion so‘m ajratish rejalashtirilgan.
Izoh (0)