Katta Farg‘ona kanaliga yana bir fuqaro oqib ketgan bo‘lishi mumkinligi yuzasidan qidiruv ishlari olib borilmoqda, deb xabar beradi “Xalq so‘zi online”.
Ma’lum qilinishicha, oqib ketganligi taxmin qilinayotgan fuqaro 1959-yili Andijon shahrida tug‘ilgan A.K. bo‘lib, kanalning Izboskan tumanidan o‘tuvchi qismida baxtsiz hodisa qurboni bo‘lgan bo‘lishi mumkin.
Ma’lumotlarga ko‘ra, 4 nafar farzandning otasi bo‘lgan A.K. 2021-yilning 28-fevral kuni Izboskan tumanidagi “Bo‘ston” MFYda istiqomat qiluvchi qarindoshlarinikiga kelgan va shu kunning o‘zida bedarak yo‘qolgan. 1-mart kuni tuman ichki ishlar bo‘limiga yo‘qolganligi to‘g‘risidagi xabar kelib tushgan.
Viloyat Favqulodda vaziyatlar boshqarmasi matbuot xizmatining xabariga ko‘ra, bedarak yo‘qolgan fuqaro Katta Farg‘ona kanaliga cho‘kib ketgan bo‘lishi mumkin va shu bois 1-mart kunidan boshlab 1 ta motorli qayiq, 1 nafar otryad boshlig‘i va 4 nafar g‘avvos ishtirokida qidiruv ishlari olib borilmoqda.
Shu kungacha kanalning Izboskan tumanining “Bo‘ston” MFY hududidan o‘tuvchi qismidan 5 kilometr masofagacha bo‘lgan hududida qidiruv ishlari olib borilgan.
Avvalroq viloyatning Yozyovon tumani Bo‘tqachi qishlog‘ida yashovchi 17 yoshli yigit 2020-yilning 22-dekabr kuni o‘zini Katta Farg‘ona kanaliga tashlagani, uning jasadi oradan 73 kun o‘tib topilgani haqida xabar berilgan edi.
Izoh (0)