Azimjon Nazarov suv xo‘jaligi vazirining birinchi o‘rinbosari lavozimiga tayinlandi. Bu haqda Telegram’dagi “Nigoh” kanali xabar berdi.
2018-yilning iyulidan buyon Azimjon Nazarov innovatsion rivojlanish vazirining o‘rinbosari lavozimida ishlab kelayotgandi. 45 yoshli vazir o‘rinbosari 1997-yili Toshkent irrigatsiya va qishloq xo‘jaligini mexanizatsiyalashtirish injenerlar institutini va 2000-yili AQShning Texas qishloq xo‘jaligi va mexanika universitetini tamomlagan.
Shuningdek, 2020-yilning aprelidan bugunga qadar suv xo‘jaligi vaziri o‘rinbosari lavozimida ishlab kelgan Vohidjon Ahmadjonov lavozimidan ozod etilgan. Uning o‘rniga Suv xo‘jaligi vazirligining Axborot-tahlil va resurs markazi direktori Rustam Qarshiyev tayinlangan.
Eslatib o‘tamiz, Qamchiq dovonida 2021-yil 1-yanvarga o‘tar kechasi Vohidjon Ahmadjonovning oila a’zolari bo‘lgan avtomobil halokatga uchragan edi. YTH oqibatida vazir o‘rinbosarining rafiqasi va 3 yoshli qizi vafot etgan, amaldorning o‘zi tan jarohatlari bilan shifoxonaga yotqizilgandi.
Izoh (0)