O‘zbekiston 2021-yilda koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratishi rejalashtirilmoqda. Bu haqda moliya vaziri Timur Ishmetov Senat yalpi majlisida ma’lum qildi.
Foto: “Daryo”
Oliy Majlis Senatining o‘ninchi yalpi majlisida “2021-yil uchun O‘zbekiston Respublikasining Davlat budjeti to‘g‘risida”gi masala muhokama qilindi va moliya vaziri sog‘liqni saqlash sohasiga ajratilishi rejalashtirilgan mablag‘lar haqida ma’lumot berdi.
“Sog‘liqni saqlash tizimida jami tadbirlar uchun 4 trillion so‘m, shu jumladan, koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratish rejalashtirilmoqda”, — deydi moliya vaziri.
Jumladan:
- Sirdaryo viloyatida tajriba tariqasida “elektron sog‘liqni saqlash” tizimini keng joriy etish, yagona milliy standartlar asosida integratsiyalashgan axborot tizimlari va ma’lumotlar bazasi majmuasini yaratish uchun 28 milliard so‘m;
- onkogematologik va davolash qiyin bo‘lgan kasalliklarga chalingan bemorlarni sog‘lomlashtirishga ko‘maklashish jamg‘armasi uchun 126 milliard so‘m (2020-yilda 100 milliard so‘m);
- fuqarolarga nefrologiya va gemodializ yordami ko‘rsatish samaradorligini oshirish xarajatlari uchun 138 milliard so‘m mablag‘ ajratish rejalashtirilmoqda (2020-yilda 131 milliard so‘m).
Bundan tashqari, sog‘liqni saqlash sohasi bo‘yicha statsionar muassasalarda imtiyozli tarzda davolanuvchi bemorlarga, birinchi navbatda, ijtimoiy ahamiyatga ega hamda infeksion kasalliklarni davolovchi muassasalarda oziq-ovqat xarajatlari hozirgi kundagi oziq-ovqat normalaridan kelib chiqib qayta ko‘rib chiqilgan. Buning natijasida oziq-ovqat xarajatlari 2020-yildagi 353 milliard so‘m mablag‘ 1,7 barobarga oshirilgan holda 614 milliard so‘mga, dori-darmon uchun 2020-yilda ajratilgan 1 trillion 400 milliard so‘m mablag‘ 1,3 barobarga oshirilgan holda 1 trillion 800 milliard so‘mga yetkazilgan.
Shuningdek, aholining sog‘lom ovqatlanishini ta’minlash uchun 28 milliard 870 million so‘m, tibbiy profilaktika ishlari samaradorligini yanada oshirish orqali jamoat salomatligini ta’minlash xarajatlari uchun 2 milliard so‘m, birlamchi tibbiy-sanitariya yordami muassasalari faoliyatiga mutlaqo yangi mexanizmlarni joriy qilish bilan bog‘liq xarajatlar uchun 20 milliard so‘m, sog‘liqni saqlash tizimini tashkil etishning yangi modeli va davlat tibbiy sug‘urtasi mexanizmlarini Sirdaryo viloyatida joriy etish xarajatlari uchun 7 milliard 700 million so‘m ajratilmoqda.
Eslatib o‘tamiz, noyabr oxirlarida O‘zbekistonning Inqirozga qarshi kurashish jamg‘armasi xarajatlari 13,4 trillion so‘mgacha oshirilgani to‘g‘risida xabar berilgandi. Ushbu mablag‘larning 3,63 trillion so‘mi koronavirusga qarshi kurash bo‘yicha tadbirlarni moliyalashtirishga yo‘naltirilgan.
