Pokiston hukumati Rossiyaning koronavirus infeksiyasiga qarshi “Sputnik V” vaksinasidan favqulodda vaziyatlarda foydalanish uchun ruxsat berdi, deb yozadi “RBK”.
“Pokiston Dorilar nazorati boshqarmasining ro‘yxatga olish kengashi tomonidan o‘tkazilgan uchrashuvda yana bir vaksina favqulodda vaziyatlarda foydalanish uchun ruxsat oldi — bu dori Rossiya to‘g‘ridan to‘g‘ri investitsiyalar fondi ko‘magida ishlab chiqilgan”, — deya Dawn gazetasiga ma’lum qildi mamlakat hukumati vakili.
Rossiya vaksinasini Pokistonga import qilish va u yerda tarqatish bilan mahalliy AGP farmatsevtika kompaniyasi shug‘ullanadi.
Shu tariqa, Pokiston “Sputnik V”dan foydalanishni ma’qullagan 12-mamlakat bo‘ldi. Bungacha Belarus, Argentina, Boliviya, Serbiya, Jazoir, Falastin, Venesuela, Paragvay, Turkmaniston, BAA va Vengriya ham vaksinani ma’qullagan edi.
Pokistonda Britaniyaning AstraZeneca kompaniyasi va Oksford universiteti hamkorligida ishlab chiqilgan vaksina hamda Xitoyning Sinopharm davlat kompaniyasi vaksinasi ham tasdiqlangan.
Rossiya to‘g‘ridan to‘g‘ri investitsiyalar fondi (RTIF) “Sputnik V” vaksinasini Turkiyada ishlab chiqarish haqida kelishib oldi. Bu haqda Turkiyaning yetakchi farmatsevtik kompaniyasi bilan bitim imzolangan va texnologiyalarni transfer qilish jarayoni boshlangan.
Potensial ishlab chiqarish hajmi — yiliga 1 million doza, shuningdek, kelgusida ishlab chiqarishni kengaytirish ehtimoli ham muhokama qilinmoqda.
Vaksina Turkiyaning ichki bozoriga ham, boshqa mamlakatlarga ham yetkaziladi.
Mavzuga doir:
- BAA va Vengriyada “Sputnik V” vaksinasi ro‘yxatdan o‘tkazildi
- Rossiyaning “Sputnik V” vaksinasi uchun harorat rejimi o‘zgartirildi — endi uni -18 o‘rniga +8 darajada saqlash mumkin
- Turkmaniston “Sputnik V” vaksinasini ro‘yxatdan o‘tkazdi
- O‘zbekistonda “Sputnik V” vaksinasini ishlab chiqarishni yo‘lga qo‘yish rejalashtirilmoqda