Toshkent shahri Yakkasaroy tumanida joylashgan Bobur ko‘chasidagi 7-uy Moddiy madaniy meros obyektlari ro‘yxatiga kiritildi. Bu haqda Vazirlar Mahkamasining 2021-yil 3-martdagi 119-sonli qarorida so‘z boradi.
Shuningdek, Shayxontohur tumani Qozirobod ko‘chasida joylashgan “Kamolon” mahallasidagi 1885-yilda qurilgan avliyo Georgiy ibodatxonasi ham arxitektura yodgorligi reyestriga kiritilgan. Bundan tashqari, 1930-yilda qurilgan Yakkasaroy tumani hokimligi binosi (sobiq Poyabzalchilar san’at saroyi) ham ro‘yxatdan o‘rin olgan.
Shu yilning fevral boshida Toshkent tumanlararo ma’muriy sudi Toshkent shahrining sobiq hokimi Abduqahhor To‘xtayevning Yakkasaroy tumani Bobur ko‘chasi 7-uyni madaniy meros obyektlari davlat ro‘yxatidan chiqarishga oid buyrug‘ini haqiqiy emas deb topgandi.
Uyda madaniy yodgorlik maqomi bo‘lmagani sabab Toshkentning amaldagi hokimi Jahongir Ortiqxo‘jayev 2018-yil 13-oktabrdagi 1550-sonli qarori bilan yer uchastkasini Universal Packing Masters kompaniyasiga “snos” va yangi ko‘p qavatli turar joy binosi qurish uchun topshirgan. Keyinroq tadbirkor Murod Nazarov o‘sha yili uch tomonlama shartnomaga binoan qurilish huquqi Jemchug House’ga berilgan.
Eslatib o‘tamiz, 2007-yilga qadar madaniy yodgorliklar ro‘yxatida bo‘lgan 7-uy Toshkent shahrining sobiq hokimi Abduqahhor To‘xtayev buyrug‘i bilan undan chiqarib tashlangan. Oradan 11 yil o‘tgach, quruvchilar aholini uydan ko‘chirishni boshlagan. Biroq uyda istiqomat qiladigan fuqarolarning bir qismi uyni yana madaniy meros obyektiga aylantirishga muvaffaq bo‘lgan. 2020-yil aprelda madaniyat vaziri tomonidan tasdiqlangan xulosada “Toshkent shahri Bobur ko‘chasidagi 7-uy me’moriy yodgorlik sifatida saqlab qolinadi” deyilgan.
Izoh (0)