Ўзбекистонда Россиянинг коронавирусга қарши «Спутник V» вакцинасини рўйхатдан ўтказиш жараёни давом этмоқда. Бу ҳақда Соғлиқни сақлаш вазирлиги ҳузуридаги Фармацевтика тармоғини ривожлантириш агентлигига таяниб, «Подробно» хабар берди. Бироқ рўйхатга олиш жараёни қачон якунланиши ҳозирча номаълум.
«Олдинроқ хабар берганимиздек, вакцина сертификациядан ўтди. Ҳозирда уни рўйхатдан ўтказиш жараёни давом этмоқда. У якунлангандан сўнг бирор-бир янгилик кутиш мумкин бўлади», — дейди агентлик матбуот хизмати.
Ўзбекистонда вакциналардан бошқа дори воситалари қатори тиббий амалиётда фақатгина давлат томонидан рўйхатга олингач, фойдаланишга рухсат берилади. Бугунги кунда республикада коронавирусга қарши рўйхатга олинган ягона вакцина — Ўзбекистон-Хитой шерикчилигида яратилган ZF-UZ-VAC2001 ҳисобланади.
Гамалея марказида ишлаб чиқариладиган «Спутник V» вакцинаси аҳолини коронавирусга қарши эмлаш учун қўлланилади. 2020 йил август ойида ушбу препарат COVID-19’га қарши қўллаш учун дунёда биринчи бўлиб рўйхатдан ўтказилган.
Маълумот учун, «Спутник V» вакцинаси Венгрия, Ливан, Серб Республикаси, Жазоир, Аргентина, Беларусь, Боливия, БАА, Сербия, Парагвай, Венесуэла, Мўғулистон, Покистон, Туркманистон, Фаластин, Гондурас, Никарагуа ва Эрон ва бошқа бир қатор мамлакатларда фойдаланиш учун тасдиқланган.
Эслатиб ўтамиз Ўзбекистон ушбу вакцинани ишлаб чиқаришда Хитой компанияси билан ҳаммуаллиф ҳисобланади. Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танлаган.Аввалроқ Ўзбекистонда коронавирусга қарши эмлаш март ойининг биринчи ярмида бошланиши маълум қилинган. Махсус комиссия қарорига кўра, Ўзбекистонда Россиянинг Гамалея илмий-тадқиқот маркази томонидан ишлаб чиқилган «Спутник V» вакцинасини қўллашга рухсат берилди. Коронавирусга қарши курашиш тадбирлари ва вакцина учун 3 триллион сўм ажратиш режалаштирилган.
Изоҳ (0)