Ob-havo injiqliklari, Armanistondagi siyosiy mojaro, vaksina yangiliklari, tugamaydigan karantin va koronavirus raqamlari. Fevral oyi yakunlari

Fevral oyini ham yakunladik va shu bilan qish ham o‘z navbatini bahorga bo‘shatib beradi. An’anaga muvofiq, oy davomida yuz bergan eng muhim voqealarni esga olsak.

Fevral oyi, nafaqat, O‘zbekistonda balki butun dunyoda ham o‘ziga xos iqlim injiqliklari bilan esda qoldi. Dastlab, Shimoliy Yevropada boshlangan anomal sovuq havo okean ortigacha yetib bordi. Hatto, Afrika ham qorsiz va sovuqsiz qolmadi.

Fevral oyining yana bir muhokamalarga sabab bo‘lgan hodisasi Armaniston bilan bog‘liq. Gap shundaki, 2020-yil kuzida Tog‘li Qorabog‘ sabab kelib chiqqan urushda mag‘lub bo‘lgan armanlar bu mag‘lubiyatga bosh vazir Pashinyanni aybdor deb hisoblamoqda. Natijada, mamlakatda norozilik namoyishlari tingani yo‘q.

Koronavirus tarqalganiga bir yildan oshib ketdi. Ammo uning tarqalishini oldini olish borasida harakatlar davom etayotgan bo‘lsada, kasallikning yangi shtammlari aniqlanishda davom etmoqda. Kasallikka qarshi kurashda vaksina samarali vosita hisoblanadi. Fevral oyida ham bir qator vaksinalar ro‘yxatga olindi hamda ayrim davlatlarda vaksinatsiya ishlari olib borildi.

Koronavirus pandemiyasi sababli butun dunyo karantin zonasiga aylanib qolgan edi. Ayrim mamlakatlar hamon karantin holatida yashashga majbur bo‘lmoqda. Ayrimlarida esa karantin talablari yumshatilmoqda.

Ayni paytga kelib butun dunyoda koronavirusni yuqtirib olish bo‘yicha holatlarning umumiy soni 114,5 milliondan oshib ketdi. Shulardan 2,5 milliondan ortig‘i vafot etgan bo‘lsa, 90 milliondan ortiq bemor tuzalishga muvaffaq bo‘lgan. Hozirda kasallikdan davolanayotganlarning umumiy soni 22 millionga yaqinlashib qolgan.

Ma’lumot uchun, dunyo bo‘ylab virusga chalinganlarning umumiy soni 17-dekabr kuni 74 million, 27-dekabr kuni 80 million, 4-yanvar kuni 85 million, 11-yanvar kuni 90 million, 18-yanvar kuni 95 million, 27-yanvar kuni 100 million, 7-fevral kuni 105 million hamda 13-fevral kuni 108 milliondan oshgandi.