Taxminan 10 million aholi yashaydigan Indoneziya poytaxti Jakarta mazkur hududga kirib kelgan mavsumiy musson nam shamoli oqibatida suv toshqini ostida qoldi. Bu haqda “Interfaks” xabar qildi.

Foto: Getty Images

“Yomg‘ir to‘xtagan, biroq Jakarta ko‘chalarida hanuzgacha boshqa hududlarga qaraganda ko‘proq suv saqlanib qolgan. Toshqinlar shahar markaziga ta’sir qilmagan va suv hududdan chiqarilganidan keyin odamlar yana o‘z uylariga qaytishi mumkin”, – degan Jakarta gubernatori Anis Basvedan.

Qutqaruvchilar shaharning janubiy va sharqiy qismidan 1,3 ming nafar aholini suv sathi 1,8 metrga ko‘tarilgani tufayli evakuatsiya qilgan. Shaharda 20 ga yaqin evakuatsiya markazlari faoliyatini boshlagan. Tabiiy ofat oqibatida halok bo‘lganlar haqida axborot berilmagan.

Sinoptiklarning prognoziga ko‘ra, yaqin kunlarda Indoneziya poytaxtida mavsumning eng kuchli yomg‘iri yog‘ishi mumkin. Kelasi haftada shaharda kuchli yomg‘irlar, momaqaldiroq va kuchli shamol bo‘lishi kutilmoqda. Yomg‘irlar mavsumi fevral oxiri yoki mart boshigacha davom etadi.

Indoneziyada tabiat injiqliklari bilan birgalikda COVID-19 koronavirusining epidemiyasi ham davom etmoqda. Indoneziya Janubi-Sharqiy Osiyo mamlakatlari orasida COVID-19’dan eng ko‘p aziyat chekayotgan hududlardan biri, shuningdek ushbu davlatda iqtisodiy tanglik ham kuzatilmoqda.

Fevral boshida Germaniyadagi Reyn daryosi qor erishi tufayli toshib ketgani haqida xabar berilgandi.