AQSh Oziq-ovqat va farmatsevtika boshqarmasi (FDA) Johnson & Johnson kompaniyasi tomonidan ishlab chiqilgan koronavirusga qarshi vaksinaning mamlakatda qo‘llanilishiga ruxsat berdi, deb xabar bermoqda “RBK” FDA saytida e’lon qilingan ma’lumotga tayanib.

Foto: Reuters

Vaksinadan favqulodda vaziyatlarda foydalanish uchun ruxsat berildi. Ushbu vaksina bilan 18 yoshdan oshgan fuqarolar emlanadi. Johnson & Johnson vaksinasi bir marotaba qilinadi.

“Barcha mavjud ma’lumotlar koronavirusga qarshi Janssen vaksinasi COVID-19’ning oldini olish bo‘yicha samarali bo‘lishi mumkinligi haqida aniq dalillarni ko‘rsatmoqda”, — deyiladi FDA xabarida. Ma’lumotlar, shuningdek, ushbu vaksinaning foydasi undan foydalanishda yuzaga kelishi mumkin bo‘lgan potensial xavfdan ustunligini ko‘rsatayotgani ta’kidlangan.

FDA ma’lumotlariga ko‘ra, vaksina “o‘rtacha” og‘irlikdagi kasalliklarning oldini olishda 66—67 foiz samaradorlikka, kasallikning og‘ir holatlarining oldini olishda esa 77—85 foiz samaradorlikka ega. Johnson & Johnson’ning o‘zi esa preparatning samaradorligini klinik sinovlarning uchinchi bosqichidan so‘ng 66—72 foizga baholagan.

Eslatib o‘tamiz, Johnson & Johnson koronavirusga qarshi o‘zining bir komponentli vaksinasidan AQShda favqulodda vaziyatlarda foydalanish uchun ruxsat so‘rab murojaat qilgandi. Murojaatnoma FDA tomonidan ko‘rib chiqilib, ruxsat berilganidan so‘ng kompaniya dozalar yetkazib berishga tayyor bo‘lishini ma’lum qilgan.

Johnson & Johnson AQShda foydalanish uchun tasdiqlanadigan uchinchi vaksina bo‘ldi. Mamlakatda hozirda Pfizer va Moderna kompaniyasining vaksinalari qo‘llanilmoqda, ommaviy vaksinatsiya 2020-yilning dekabr oyi oxirida boshlangan.

The Telegraph’ning yozishicha, Buyuk Britaniya ham yaqin kunlarda Johnson & Johnson kompaniyasining koronavirusga qarshi yagona komponentli vaksinasidan foydalanishni rasman ma’qullashi kutilmoqda.