Yevropa Ittifoqi mamlakatlari yaqin kelajakda koronavirusga qarshi emlanganlik to‘g‘risida raqamli sertifikatlar yaratishga kelishdi. Bu haqda Germaniya kansleri Angela Merkel Yevroittifoq davlatlari rahbarlari bilan o‘tkazilgan uchrashuvdan keyin bayonot berdi, deb yozmoqda Meduza.

Foto: “RIA Novosti”

Merkelning ta’kidlashicha, hamjamiyat mamlakatlari yaqin uch oy ichida tegishli sertifikatlarni joriy etish va ularni yagona tizimga birlashtirishni rejalashtirmoqda.

Merkel bunday sertifikatlar bilan Yevroittifoq hududida erkin harakatlanish mumkinligini ta’kidladi. Shuningdek, sertifikatning mavjudligi Yevroittifoqga uchinchi mamlakatlar rezidentlarining kirishi uchun asos bo‘lib xizmat qiladi.

Shu bilan birga, Yevropa Kengashi rahbari Sharl Mishel mazkur hujjatdan foydalanish mezonlari va ularning egalariga beriladigan imtiyozlarga hali aniqlik kiritilmaganini ta’kidladi.

Ma’lumot uchun 2020-yilning mart oyidan beri Yevropa Ittifoqiga boshqa mamlakatlardan tashrif buyuruvchilar uchun tashqi chegaralar yopiq. 2020-yil iyul oyida o‘nga yaqin mamlakat aholisiga Yevroittifoqga erkin kirish huquqi berildi, o‘sha paytda bu mamlakatlarda kasallikning tarqalishi minimal darajada bo‘lgan, shu jumladan, keyinchalik ruxsat berilgan mamlakatlar ro‘yxati bir necha marta qisqartirildi. Hozirda bunday davlatlar atigi oltita —  Avstraliya, Yangi Zelandiya, Ruanda, Singapur, Tailand va Janubiy Koreya.

Ayni paytda Yevroittifoq ichida ham sayohat qilish cheklangan. Ittifoq mamlakatlaridan birortasida yashovchi fuqaro hamjamiyatning boshqa aksariyat davlatlariga faqat jiddiy sabablarga bilan, masalan, ish yoki oilasi bag‘riga qaytishni maqsad qilgan taqdirda kirishi mumkin. Ittifoqning ba’zi davlatlarida COVID-19 testining salbiy natijasini ko‘rsatish bilan erkin harakatlanish mumkin bo‘ladi.

Eslatib o‘tamiz, Yevropa Ittifoqi kengashi pandemiya yuzasidan Shengen hududiga kirish cheklovlari bo‘yicha yangi tavsiyalarni ma’qulladi. Yangi cheklovlar 2-fevral kuni yozma tartibda qabul qilindi. Xususan, tavsiyalar YeIning uchinchi mamlakatlar bilan chegaralarini har qanday tashrif, shu jumladan, sayyohlik uchun ochishiga oid yangi shartlarni nazarda tutadi. Buning uchun mamlakat bir qancha mezonlarga javob berishi kerak.