Dunyoda koronavirusga chalinganlar soni 74 million kishidan oshdi

Dunyo bo‘yicha koronavirusga chalinganlar soni 74,1 million kishiga yetdi, deb xabar beradi “Kommersant” Jons Hopkins universiteti ma’lumotlariga tayanib. So‘nggi bir kecha-kunduzda 625 mingta yangi kasallanish holati aniqlangan. Pandemiya boshidan buyon 1,6 milliondan ortiq odam COVID-19 oqibatida vafot etgan.

Koronavirusga chalinish holatlari bo‘yicha AQSh (16,9 million), Hindiston (9,9 million), Braziliya (7 million) va Rossiya (2,7 million) yetakchi bo‘lib qolmoqda. Kasallanish holatlari dunyoning jami 191 ta mamlakatida qayd etilgan.

Koronavirus oqibatida vafot etish holatlari eng ko‘p AQShda (307 ming kishi), Braziliyada (183 ming), Hindistonda (144 ming) va Meksikada (115 ming) kuzatilgan.

Ketma-ket 11 haftadan buyon rekord sonli kasallanishlar qayd etilmoqda. Jahon sog‘liqni saqlash tashkiloti (JSST) mutaxassislari fikricha, virus tarqalishini to‘xtatish uchun aholining 60—70 foizini emlash zarur. Shu bilan birga, tashkilot vaksinaning o‘zigina virusni to‘xtata olmasligini ta’kidladi.

Shuningdek, JSST kambag‘al mamlakatlar 2024-yilgacha koronavirusga qarshi vaksinasiz qolish xavfi mavjudligini ham qayd etdi. Bundan tashqari, tashkilot Rojdestvo va Yangi yil bayramlari sababli Yevropada 2021-yilning boshida koronavirusning yangi to‘lqini yuzaga kelishi ehtimoli yuqori ekanligidan ogohlantirdi.

Ma’lumot uchun, dunyoda koronavirusga chalinganlar soni 4-dekabr kuni 65 million, 5-dekabr kuni 66 million, 7-dekabr kuni 67 million, 9-dekabr kuni 68 million, 12-dekabr kuni 70 million kishidan oshgandi.