AQShning sobiq prezidenti Donald Tramp 2024-yilda mamlakat prezidentligi uchun nomzodini qo‘yishi mumkinligiga ishora qildi. U kelgusi saylovlarda ham g‘alaba qozonishiga va 2020-yilda bo‘lib o‘tgan prezidentlik saylovlarida g‘olib chiqqaniga ishonishini bildirdi, deb yozmoqda “Kommersant”.
“Kim bilsin, ehtimol, men demokratlarni uchinchi marotaba mag‘lub etishga qaror qilarman”, — dedi Tramp CPAC konservativ konferensiyasi ishtirokchilari oldida so‘zlagan nutqida. Uning mazkur nutqi yanvar oyida prezidentlik lavozimidan iste’foga chiqqandan beri omma oldida birinchi chiqishi bo‘ldi.
Tramp siyosatda qolish niyatida ekanini tasdiqladi. “Ushbu zal va butun mamlakat ko‘pdan ko‘p ajoyib do‘stlar, konservatorlar va fuqarolarga to‘la. Men sizning huzuringizda shuni ma’lum qilish uchun turibman: to‘rt yil oldin biz siz bilan boshlagan yoqimli sarguzasht hali beri tugamaydi...”, — dedi u. Sobiq prezidentning so‘zlariga ko‘ra, harakat “endigina boshlanmoqda va oxir-oqibat biz g‘alaba qozonamiz”. U Respublikachilar partiyasining qo‘llab-quvvatlashiga umid qilishini ta’kidladi va yangi siyosiy partiya tuzilishini rad etdi. Yanvar oyida The Wall Street Journal Trampga yaqin odamlar orasida yangi partiya tuzish bo‘yicha muhokamalar haqida xabar bergan edi.
AQShning sobiq prezidenti uning o‘rnini egallagan Jo Bayden va Demokratik partiya boshqa vakillarining siyosatini, xususan, energetika masalalarida tanqid qildi. Sobiq prezidentning so‘zlariga ko‘ra, demokratlarning qarorlari AQShni Rossiya va Yaqin Sharq belgilaydigan neft narxiga qaramlikka olib keladi.
Ma’lumot uchun Donald Tramp 2017-yildan 2021-yilgacha AQSh prezidenti bo‘lgan. U faoliyati davomida ikki marotaba impichment e’lon qilingan ilk prezidentga aylangan: 2019-yilda Vakillar palatasi uni vakolatini suiiste’mol qilishda va AQSh Kongressining ishiga aralashishda, 2021-yilda esa qo‘zg‘olonga da’vat qilganlikda ayblagan. Senat ikkala ayblov bo‘yicha ham Trampni oqlagan.
Izoh (0)