Yaponiya shimoli-sharqida, Fukusima prefekturasi hududida 5,2 magnitudali yana bir zilzila sodir bo‘ldi, deb yozadi “RBK” Yaponiya meteorologiya agentligiga tayanib.
Uning ma’lumotlariga ko‘ra, yer silkinishlari mahalliy vaqt bilan 14-fevral, yakshanba kuni soat 16:31 (Toshkent vaqti bilan soat 12:31)da qayd etilgan. Zilzila o‘chog‘i 50 km chuqurlikda suv ostida joylashgan. Soat 16:59 (12:59)da Fukusima yaqinida 4,3 magnitudali yana boshqa zilzila kuzatildi.
Yaponiyada zilziladan jabrlanganlar soni 150 kishiga yetdi, 950 mingga yaqin uy xo‘jaliklari elektr quvvatisiz qoldi.
Dastlabki 7,3 magnitudali zilzila 13-fevral, shanba kuni soat 23:08 da (Toshkent vaqti bilan soat 19:08) Tinch okeanidagi Fukusima prefekturasi hududida yuz bergandi. Zilzila o‘chog‘i 55 km chuqurlikda joylashdi, yer silkinishlari Tokioda ham sezildi.
Ushbu zilzila mamlakat shimoli-sharqida, shuningdek, poytaxt Tokioda ham sezildi. Yerosti silkinishlari sunamiga olib kelmadi. Keyinroq Yaponiyada kichikroq ko‘lamdagi ketma-ket aftershoklar qayd etildi.
Zilzila tufayli “Fukusima-2” atom elektr stansiyasida ishlatilib bo‘lgan yadro yoqilg‘isini saqlash uchun mo‘ljallangan havzadan radioaktiv suvning bir qismi sochilib chiqdi. Natijada hukumat uning energobloklarining bir qismidan foydalanishni to‘xtatishga qaror qildi. Ularning axborotiga ko‘ra, sachrab chiqqan suv hajmi katta bo‘lmagan va hodisa yadro yoqilg‘isini sovitish jarayoniga ta’sir qilmagan.
Yaponiya milliy meteorologik boshqarmasi vakili taxmin qilishicha, hodisa 2011-yilgi vayronkor zilzila oqibati bo‘lishi mumkin. Bu haqda Tokio universiteti Zilzilalarni tadqiq qilish instituti professori Kenji Satake ham aytib o‘tdi. Uning so‘zlariga ko‘ra, “o‘n yildan keyin bunday ko‘lamdagi aftershok yuz berishi ajablanarli emas”.
Bunda gap 2011-yil mart oyida Yaponiyaning Xonsyu oroli sharqiy qirg‘oqlarida sodir bo‘lgan va sunamiga olib kelgan 9,0 magnitudali zilzila haqida bormoqda. Tabiiy ofat oqibatida 25,9 ming kishi halok bo‘lgan.
Seysmologlar ogohlantirishicha, yaqin haftalar ichida qaytadan kuchli yerosti silkinishlari sodir bo‘lishi mumkin. Yaponiya bosh vaziri Yosixide Suga mamlakat fuqarolariga uyda qolishni tavsiya qildi.
Izoh (0)