Janubiy Afrikada joylashgan Gvineyada 2016-yildan beri birinchi marta Eboladan kamida to‘rtta o‘lim holati qayd etildi. Bu haqda mamlakat Sog‘liqni saqlash vazirligi rahbari Remi Lamaxga tayanib “RBK” xabar berdi.
“Biz juda xavotirdamiz. Janubi-sharqiy provinsiya Nzerekoreda Ebola gemorragik isitmasidan to‘rtta o‘lim holati qayd etildi”, — degan u.
Keyinchalik Jahon sog‘liqni saqlash tashkiloti (JSST) bosh direktori Tedros Gebreyesus tashkilot Gvineyada Ebola bilan kasallanish gumon qilingan ikki holat aniqlanganligi haqida Twitter’dagi sahifasida xabar berdi. “Hozirda test tekshiruvi olib borilmoqda”, — deb yozgan Tedros Gebreyesus.
Ma’lumot uchun, Ebola virusi odam va hayvonlarga ta’sir qiluvchi o‘tkir infeksiyani keltirib chiqaradi. Kasallik birinchi marta 1976-yilda aniqlangan. Ushbu virusli kasallik 2013—2016-yillarda G‘arbiy Afrikada juda keng tarqalib ketdi. Gvineyada boshlangan kasallik Liberiya va Syerra-Leonega ham o‘tib ketdi. Kasallikning o‘ziga xos xavfli jihati unda kasallanganlar orasida o‘lim holatining yuqoriligidadir. O‘sha paytda 11 315 kishi yoki kasallarning 50 foizi vafot etgan. 2019-yilning iyul oyida Kongoda qayd etilganidan keyin JSST xalqaro favqulodda holat e’lon qilgan. Mamlakatda kasallik paydo bo‘lganidan buyon 2200 kishi vafot etgan.
2020-yil yozida Kongoda Ebola epidemiyasi yuz bergan, ushbu virus bilan 12 kishi kasallangandi.
Izoh (0)