Hindistonda muzlik ko‘chishi oqibatida halok bo‘lganlar soni 41 kishiga yetdi

Hindistonning Uttarakxand shtatida muzlik ko‘chishi oqibatida halok bo‘lganlar soni 41 kishiga yetdi, deb xabar beradi “RIA Novosti” favqulodda vaziyatlarga javob ko‘rsatish markaziga tayanib.

Hindiston Ichki ishlar vazirligi ma’lumotlariga ko‘ra, 7-fevral kuni o‘pirilib tushgan muzlik Rishiganga daryosida suv sathining ko‘tarilishiga sabab bo‘lgan, u esa 13,2 MVt quvvatiga ega shu nomli gidroelektrostansiyani yuvib ketgan. To‘satdan yuz bergan suv toshqini Tapovan shahridagi Dxauliganga daryosida joylashgan NTPC gidroelektrostansiyasi (Hindistonning eng yirik energetika kompaniyasi) loyihasiga ham ta’sir ko‘rsatgan.

So‘nggi ma’lumotlarga qaraganda, 164 kishi bedarak yo‘qolgan deb hisoblanmoqda. Qidiruv operatsiyasida milliy va mahalliy qutqaruvchilar, hind-tibet politsiyasi xodimlari va harbiylar ishtirok etmoqda.

Avvalroq qutqaruvchilar Tapovanda barpo etilayotgan GES loyihasi hududidagi tunneldan ikki kishining jasadini chiqarib olgan edi. Qutqaruvchilar bir necha kunlardan buyon ushbu tunneldan u yerda bor deb taxmin qilinayotgan 30—35 kishini chiqarib olishga urinmoqda.

Shuningdek, yana boshqa bir tunneldan Tapovan GESini qurishda ishtirok etgan 15 kishi chiqarib olingan.

Eslatib o‘tamiz, 7-fevral kuni Hindistonning Uttarakxand shtatida 150 ga yaqin kishi tog‘dan muz ko‘chishi oqibatida bedarak yo‘qolgan edi. Tapovan energetika loyihasining to‘g‘oni buzilishi oqibatda toshqin sodir bo‘lgan.