Yaponiyada Pfizer flakonidan oltita dozaning hammasini olishga mo‘ljallangan maxsus shpritslarning yetishmasligi sabab avval rejalashtirilgandan ko‘ra kamroq odam koronavirusga qarshi emlanishi mumkin. Bu haqda The Japan Times gazetasiga tayanib “Interfaks” xabar berdi.

“Yaponiyada ishlatilayotgan shpritslar Pfizer flakonidan faqat beshta dozani chiqara oladi. Bizda bor bo‘lgan oltita dozani chiqarib beruvchi barcha shpritsdan foydalanamiz. Lekin, albatta, ular yetarli bo‘lmaydi”, — dedi mamlakat sog‘liqni saqlash vaziri Norixisa Tamura.

Pfizer vaksinani olti dozali maxsus flakonda yetkazib beradi. Lekin flakondan oltinchi dozani olish uchun Yaponiyada ishlatilayotganidan farqli, maxsus shprits kerak.

Yaponiyada har bir flakondagi oltita dozaning faqat beshtasidan foydalanish mumkin, bu 60 million kishini Pfizer vaksinasi bilan emlashga imkon beradi, lekin avvalroq rasmiylar vaksina dozalari 72 million kishiga yetishini aytgan edi.

Pfizer vaksinasi hozircha Yaponiya Sog‘liqni saqlash vazirligi tomonidan o‘rganilyapti. 15-fevral kuni vaksina ma’qullanishi mumkin. Shuningdek, AstraZeneca ham ro‘yxatdan o‘tish uchun ariza bergan.

Yaponiya hukumati 17-fevraldan tibbiyot xodimlarini vaksinatsiya qilishni boshlashni rejalashtirmoqda.

Pandemiya boshidan buyon Yaponiyada 406 mingta koronavirusga chalinish holati ro‘yxatga olindi, 6,4 ming kishi virus qurboniga aylandi.