Konnektikut shtatida 2013-yilda ishlab chiqarilgan Lotus Evora S nihoyat o‘z egasini topdi, deb xabar beradi Motor. “Qari yangi avtomobil” nomini olgan oq sportkar o‘z egasini yetti yil davomida kutgan.
Ikki eshikli modelni Nyu-Yorkda istiqomat qiluvchi fuqaro olib ketgan. Ma’lum bo‘lishicha, uning avtoparkida yana bitta Lotus — Elise rodsteri mavjud. Kafolat muddati allaqachon tugagan Evora S 70 ming dollarga sotilgan, bu boshlang‘ich narxdan 20 ming dollarga arzon.
Avtosalonda avtomobilning shinalariga qaytadan havo urilgan va motor moyidan boshqa barcha texnik suyuqliklari almashtirilgan: uni o‘z egasi 1,6 ming kilometr yo‘l bosganidan so‘ng almashtirishi lozim. Yetti yil davomida kupe isitiladigan bino ichida saqlangan. Odometriga ko‘ra, sportkar 160 kilometr yo‘l bosgan.
Nashrning ta’kidlashicha, Konnektikutda sport avtomobillarining ko‘plab ishqibozlari istiqomat qiladi. Shu sababli kupe nima sababdan buncha uzoq vaqt dilerlik markazida qolib ketgani hayratlanarli. Salon bosh menejeri Stiv Plonning taxminicha, bunga sportkar narxi sabab bo‘lgan bo‘lishi mumkin, biroq uni arzonlashtirishga rozi bo‘lmagan.
Avtosalon parkida yana yettita Lotus GT, shuningdek, Red Velvet kuzovidagi Evora 400 ham o‘z egasini kutmoqda.
Avvalroq Canepa auksioni orqali 20 yil davomida garajda qolib ketgan noyob BMW M1 sotuvga qo‘yilgani to‘g‘risida xabar berilgandi.
Izoh (0)