Коннектикут штатида 2013 йилда ишлаб чиқарилган Lotus Evora S ниҳоят ўз эгасини топди, деб хабар беради Motor. «Қари янги автомобиль» номини олган оқ спорткар ўз эгасини етти йил давомида кутган.
Икки эшикли моделни Нью-Йоркда истиқомат қилувчи фуқаро олиб кетган. Маълум бўлишича, унинг автопаркида яна битта Lotus — Elise родстери мавжуд. Кафолат муддати аллақачон тугаган Evora S 70 минг долларга сотилган, бу бошланғич нархдан 20 минг долларга арзон.
Автосалонда автомобилнинг шиналарига қайтадан ҳаво урилган ва мотор мойидан бошқа барча техник суюқликлари алмаштирилган: уни ўз эгаси 1,6 минг километр йўл босганидан сўнг алмаштириши лозим. Етти йил давомида купе иситиладиган бино ичида сақланган. Одометрига кўра, спорткар 160 километр йўл босган.
Нашрнинг таъкидлашича, Коннектикутда спорт автомобилларининг кўплаб ишқибозлари истиқомат қилади. Шу сабабли купе нима сабабдан бунча узоқ вақт дилерлик марказида қолиб кетгани ҳайратланарли. Салон бош менежери Стив Плоннинг тахминича, бунга спорткар нархи сабаб бўлган бўлиши мумкин, бироқ уни арзонлаштиришга рози бўлмаган.
Автосалон паркида яна еттита Lotus GТ, шунингдек, Red Velvet кузовидаги Evora 400 ҳам ўз эгасини кутмоқда.
Аввалроқ Canepa аукциони орқали 20 йил давомида гаражда қолиб кетган ноёб BMW М1 сотувга қўйилгани тўғрисида хабар берилганди.
Изоҳ (0)