“Formula-1”ning yetti karra chempioni Lyuis Xemilton Porsche Taycan’da harakatlanib o‘z muxlislarini hayron qoldirdi. Internetda Mercedes-AMG F1 jamoasi bilan oltita sovrinni qo‘lga kiritgan britaniyalik raqobatchi firmaning elektromobilini boshqarayotgani tasvirlangan suratlar tarqalgan. Xemiltonning Mercedes bilan amaldagi shartnomasining yo‘qligi vaziyatni yanada chigallashtiradi, deb yozadi Motor.
Oq Porsche Taycan Turbo S’ni boshqarib ketayotgan Xemiltonning surati Daimler rahbarlariga yoqmasa kerak, biroq Lyuis rasman hech qanday tartibni buzmagan bo‘lishi mumkin: poygachining Mercedes-AMG bilan oxirgi shartnomasi 2020-yilning dekabrida tugagan, mavsumoldi testlariga bir oydan sal oshiqroq vaqt qolganiga qaramay, yangi shartnoma imzolangani hamon e’lon qilinmadi.
Odatda “Formula-1” yulduzlari o‘z ish beruvchilari va homiylariga sodiq bo‘ladi: kundalik hayotida poygachilar raqobatchi jamoaning avtomobillarida harakatlanmaydi, agar u klassik avtomobil yoki taksi bo‘lmasa. Mercedes-Benz EQS elektromobili premyerasidan oldin 761 ot kuchiga ega Taycan Turbo S’da namoyishkorona harakatlanish — Xemilton tomonidan amalga oshirilgan noodatiy qadam va Porsche’ning ulkan muvaffaqiyatidir.
Mercedes-AMG F1 rahbari Toto Volff bir necha bor Xemilton bilan yangi shartnoma imzolanishiga shama qilgan. So‘nggi muddat: 2-mart kuni chempion jamoa yangi W12 E Performance bolining taqdimotini o‘tkazadi va aynan shu kuni poygachilar bilan intervyu rejalashtirilgan.
Avvalroq Porsche kompaniyasi Britaniyaning Brands Hatch Circuit trassasida Taycan 4S va Turbo S seriyali modellarini bardoshlilik sinovidan o‘tkazgani, bir necha soat davom etgan ming kilometrli harakatlanish davomida elektromobillar Buyuk Britaniyada 13 ta rekordni o‘rnatgani to‘g‘risida xabar berilgandi.
Izoh (0)