Gollivudning taniqli aktyori Silvestr Stallone yangi Chevrolet Corvette C8’ni qo‘lga kiritgan birinchi mijozlar qatoridan joy oldi. U qadar mashhur bo‘lmagan mijozlar buyurtma qilgan sportkarlarini kutayotgan bir paytda, “Rokki” va “Rembo” o‘z avtomobili qarshisida suratga tushishni boshlab yubordi, deb xabar beradi Motor.
Stallone yangi Corvette’ni Merfrisboro shahridagi (Tennessi shtati) Chevrolet dileridan sotib olgan. U yerdan sportkar aktyorning Floridadagi uyiga yetkazib berilgan, xususan, yetkazib berish ishlari bilan avtosalon egasi Bo Trivettning shaxsan o‘zi shug‘ullangan. U Facebook’dagi sahifasiga yulduz bilan Rapid Blue rangidagi yangi avtomobil fonida tushgan suratini joylashtirgan va Stallone endi uning mijozi ekanligini tasdiqlagan.
AutoEvolution nashrining taxminicha, Stallone mashhurligi sabab modelni birinchilardan bo‘lib qo‘lga kiritgan mijozlar qatoridan o‘rin olgan — unga mashina navbatdan tashqari yetkazib berilgan. Ayrim ma’lumotlarga ko‘ra, oldindan buyurtma uchun ariza bergan mijozlar hamon o‘z Corvette’larini kutmoqda. Masalan, Jorjiya shtatida istiqomat qiluvchi Dennis Kaler 2020-yilning dekabrida lotereyada yangi Chevrolet Corvette’ni yutib olgan, biroq hamon uni qabul qilib olganicha yo‘q.
Corvette C8 kupesining narxi 59 995 dollardan boshlanadi, rodster uchun esa kamida 67 495 dollar to‘lash kerak. Jamlanmasi va qo‘shimcha qurilmalar bilan model narxi 100 ming dollarga yetadi. Stallonening mashinasi qanchaga tushgani bo‘yicha ma’lumotlar yo‘q.
Avvalroq Silvestr Stallone o‘zining Cadillac Escalade’sini 350 ming dollarga sotayotgani to‘g‘risida xabar berilgandi.
Izoh (0)