Samarqand viloyati Kattaqo‘rg‘on tumanida o‘zining zo‘rlanganini aytib IIBga murojaat qilgan 17 yoshli fuqaro oradan bir hafta o‘tib, bedarak yo‘qoldi. Zo‘rlashda ayblangan fuqarolardan biri uyida vafot etgan. Bu haqda viloyat prokuraturasi matbuot xizmati xabar berdi.
Ma’lum qilinishicha, 2021-yil 2-yanvar kuni 2004-yilda tug‘ilgan voyaga yetmagan P.E. Kattaqo‘rg‘on tuman IIBga ariza bilan murojaat qilib, unda fuqaro I.S. o‘zining Matiz rusumli avtomashinasida uni Kattaqo‘rg‘on shahar “Chinobod” mahallasi hududiga olib borib, zo‘rlik ishlatib nomusiga tekkanini bildirgan. Shuningdek, jabrlanuvchi S.R. ismli fuqaro ham “VAZ-2106” rusumli avtomashinasida uni Kattaqo‘rg‘on tumani hududida joylashgan “Suv ombori” hududiga olib borib, uni zo‘rlab jinsiy aloqa qilganligini ko‘rsatib, ularga nisbatan chora ko‘rishni so‘ragan.
Mazkur holat yuzasidan Kattaqo‘rg‘on tuman IIB huzuridagi tergov bo‘limi tomonidan tergovga qadar tekshiruvga kirishilib, voqea joyi ko‘zdan kechirilgan, ishga aloqador shaxslarning ko‘rsatuvlari olinib, voyaga yetmagan P.E.ning tanasida tan jarohatlariga aniqlik kiritish maqsadida sudga oid tibbiy ekspertiza tayinlangan.
Ishda to‘plangan dalillarga asosan Jinoyat kodeksining 118-moddasi (nomusga tegish) 1-qismi bilan jinoyat ishi qo‘zg‘atilib, hozirda jinoyat ishi yuzasidan hududiy tegishliligi bo‘yicha Kattaqo‘rg‘on shahar IIB huzuridagi tergov bo‘limi tomonidan dastlabki tergov harakatlari olib borilmoqda.
Bundan tashqari, P.E.ning arizasida ko‘rsatilgan fuqaro S.R. 13-yanvar kuni o‘zining Kattaqo‘rg‘on tumani “Saroyqo‘rg‘on” mahallasida joylashgan uyida vafot etganligi aniqlangan.
Fuqaro S.R.ning o‘lim sabablarini aniqlash yuzasidan Kattaqo‘rg‘on tuman prokuraturasi tomonidan tergovga qadar tekshirish harakatlari olib borilmoqda.
Shuningdek, 14-yanvar kuni Kattaqo‘rg‘on shahar prokuraturasiga fuqaro S.S. ariza bilan murojaat qilib, unda voyaga yetmagan farzandi P.E. 10-yanvar kuni uyidan noma’lum tomonga chiqib ketib, qaytib kelmasdan bedarak yo‘qolganligini bildirgan.
Mazkur holat yuzasidan Kattaqo‘rg‘on shahar prokuraturasi tomonidan tergovga qadar tekshirish harakatlari olib borilmoqda.
Avvalroq xonanda Jasur Umirov voyaga yetmagan Sh.M.ning nomusiga teggani yuzasidan 2020-yilning 9-oktabr kuni Samarqand viloyati IIB huzuridagi Tergov boshqarmasi tomonidan jinoyat ishi qo‘zg‘atilgan edi. Keyinroq Oliy sud xonandaning sudi yopiq tarzda o‘tkazilishini ma’lum qilgan.
Izoh (0)