Toshkent shahrida 2021-yilda 22 ta maktabgacha ta’lim tashkiloti rekonstruksiya qilinadi. Bu haqda 19-yanvar, seshanba kuni bo‘lib o‘tgan Xalq deputatlari Toshkent shahar kengashining o‘ttiz birinchi sessiyasida Toshkent shahar hokimi Jahongir Ortiqxo‘jayev aytib o‘tdi.
Sessiyada ma’lum qilinishicha, Toshkent shahrida 2021-yil bitta yangi 333 o‘rinli maktabgacha ta’lim tashkiloti quriladi va 22 ta maktabgacha ta’lim tashkilotida rekonstruksiya ishlari amalga oshiriladi. Qamrovda ehtiyoj katta bo‘lgan Olmazor, Shayxontohur, Uchtepa tumanlarida jami 17 ta mavjud maktabgacha ta’lim tashkiloti hududiga qo‘shimcha binolar qurish va ularning quvvatini oshirish hisobiga yana 2 ming 200 nafar bola qamrab olinadi.
Jahongir ortiqxo‘jayevning ta’kidlashicha, “bu vaqtinchalik, yana hozir qo‘shimcha maktablarni qurish bo‘yicha rejalarimiz ishlab chiqilyapti”.
Qo‘shimcha qilinishicha, qamrovda ehtiyoj katta bo‘lgan Olmazor, Shayxontohur, Uchtepa tumanlarida jami 17 ta mavjud maktabgacha ta’lim tashkiloti hududida qo‘shimcha binolar qurish va ularning quvvatini oshirish hisobiga yana 2 ming 200 nafar bola qamrab olinadi.
“Maktabgacha ta’lim tashkiloti binolarining ta’mirtalabligi sababli faoliyati to‘xtatilgan 125 ta yopiq guruhning binolari ta’mirlanib, qayta tashkil etiladi. Bugungi kunda yangi qurilgan va ta’mirdan chiqarilgan 14 ta maktabgacha ta’lim tashkiloti hamda 149 ta guruh kerakli bo‘lgan jihozlar bilan ta’minlanadi. Toshkent shahrida maktabgacha ta’lim muassasalariga qamrovi bugungi kunda 91,5 foizni tashkil etayotgan bo‘lsa, yuqoridagi ishlarni amalga oshirish natijasida yil yakuniga qadar 100 foiz qamrovga erishiladi”, — dedi hokim.
Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida kelgusi yillarda O‘zbekistonning maktabgacha ta’lim sohasini rivojlantirish borasidagi strategik maqsadi — ijtimoiy ahvolidan qat’i nazar, bog‘cha yoshidagi har bir bolani ushbu ta’lim yo‘nalishi bilan to‘liq qamrab olish uchun zarur sharoitlarni yaratishdan iborat ekanligini aytib o‘tgan edi.
Murojaatnomada ta’kidlanishicha, 2021-yil yakuni bilan maktabgacha ta’lim qamrovini 65 foizga, 2023-yil oxirida esa 75 foizga yetkazilishi kerak. Bu ishlarga budjetdan 600 milliard so‘m subsidiya berish hisobidan qo‘shimcha 2 mingta nodavlat bog‘cha tashkil etilib, xususiy sektor ulushi 25 foizga yetkaziladi. Shuningdek, 2021-yilda maktabga tayyorlashning bepul tizimi bilan 560 ming nafar 6 yoshli bola yoki ularning 82 foizi qamrab olinadi.
Izoh (0)