Самарқанд вилояти Каттақўрғон туманида ўзининг зўрланганини айтиб ИИБга мурожаат қилган 17 ёшли фуқаро орадан бир ҳафта ўтиб, бедарак йўқолди. Зўрлашда айбланган фуқаролардан бири уйида вафот этган. Бу ҳақда вилоят прокуратураси матбуот хизмати хабар берди.
Маълум қилинишича, 2021 йил 2 январь куни 2004 йилда туғилган вояга етмаган П.Э. Каттақўрғон туман ИИБга ариза билан мурожаат қилиб, унда фуқаро И.С. ўзининг Matiz русумли автомашинасида уни Каттақўрғон шаҳар «Чинобод» маҳалласи ҳудудига олиб бориб, зўрлик ишлатиб номусига текканини билдирган. Шунингдек, жабрланувчи С.Р. исмли фуқаро ҳам «ВАЗ-2106» русумли автомашинасида уни Каттақўрғон тумани ҳудудида жойлашган «Сув омбори» ҳудудига олиб бориб, уни зўрлаб жинсий алоқа қилганлигини кўрсатиб, уларга нисбатан чора кўришни сўраган.
Мазкур ҳолат юзасидан Каттақўрғон туман ИИБ ҳузуридаги тергов бўлими томонидан терговга қадар текширувга киришилиб, воқеа жойи кўздан кечирилган, ишга алоқадор шахсларнинг кўрсатувлари олиниб, вояга етмаган П.Э.нинг танасида тан жароҳатларига аниқлик киритиш мақсадида судга оид тиббий экспертиза тайинланган.
Ишда тўпланган далилларга асосан Жиноят кодексининг 118-моддаси (номусга тегиш) 1-қисми билан жиноят иши қўзғатилиб, ҳозирда жиноят иши юзасидан ҳудудий тегишлилиги бўйича Каттақўрғон шаҳар ИИБ ҳузуридаги тергов бўлими томонидан дастлабки тергов ҳаракатлари олиб борилмоқда.
Бундан ташқари, П.Э.нинг аризасида кўрсатилган фуқаро С.Р. 13 январь куни ўзининг Каттақўрғон тумани «Саройқўрғон» маҳалласида жойлашган уйида вафот этганлиги аниқланган.
Фуқаро С.Р.нинг ўлим сабабларини аниқлаш юзасидан Каттақўрғон туман прокуратураси томонидан терговга қадар текшириш ҳаракатлари олиб борилмоқда.
Шунингдек, 14 январь куни Каттақўрғон шаҳар прокуратурасига фуқаро С.С. ариза билан мурожаат қилиб, унда вояга етмаган фарзанди П.Э. 10 январь куни уйидан номаълум томонга чиқиб кетиб, қайтиб келмасдан бедарак йўқолганлигини билдирган.
Мазкур ҳолат юзасидан Каттақўрғон шаҳар прокуратураси томонидан терговга қадар текшириш ҳаракатлари олиб борилмоқда.
Аввалроқ хонанда Жасур Умиров вояга етмаган Ш.М.нинг номусига теггани юзасидан 2020 йилнинг 9 октябрь куни Самарқанд вилояти ИИБ ҳузуридаги Тергов бошқармаси томонидан жиноят иши қўзғатилган эди. Кейинроқ Олий суд хонанданинг суди ёпиқ тарзда ўтказилишини маълум қилган.
Изоҳ (0)