Samarqand viloyati Kattaqo‘rg‘on tumani Payshanba shaharchasi “Payshanba” dehqon bozori “Payshanba” shaharcha fuqarolar yig‘inida “Shavkat Miromonovich Mirziyoyev” oilaviy korxonasi faoliyat yuritadi. Korxona haqidagi ma’lumotlar bilan Korxona va tashkilotlarning yagona davlat registri (KTYaDR)da tanishish mumkin.
Korxona 2020-yil 14-fevral kuni Davlat xizmatlari markazi tomonidan ro‘yxatga olingan. Registr ma’lumotlariga ko‘ra, ustav fondi 1000 (ming) so‘mni tashkil etadi. Korxonaning 50 foizi ulushi Shoxruz Toshpo‘latovga, qolgan 50 foizi Abdulla Toshevga tegishli. Registr ma’lumotlariga ko‘ra, uning asosiy faoliyat turi — ovqatlanishni tashkil qilishning boshqa turlari.
Korxona rahbari Abdulla Toshevning “Daryo” muxbiri bilan suhbatda ma’lum qilishicha, hozirda korxona huzuridagi tashkil etilgan oshxona va paynet shoxobchasi aholiga xizmat ko‘rsatmoqda. Bundan tashqari, korxona aviakassa, ya’ni turizm xizmatlarini ko‘rsatish bilan ham shug‘ullanadi. Biroq pandemiya davrida bu yo‘nalishdagi ishlar vaqtincha to‘xtab qolgan.
Abdulla Toshevning ta’kidlashicha, u va uning ish bo‘yicha sheriklari prezident Shavkat Mirziyoyev olib borayotgan siyosatdan quvonib, oilaviy korxonaga uning nomini qo‘yganini ma’lum qildi.
“Tadbirkorlik faoliyatimni maktabni bitirish arafasida boshlaganman. 27 yildan beri shu sohadaman. Ochig‘i, avvallari tadbirkor sifatida ko‘p qiyinchilik ko‘rganmiz. Hozirgi prezidentimiz davlat rahbari bo‘lgach, yo‘llarimiz ochildi, men kabi tadbirkor va biznesmenlar qo‘llab-quvvatlanyapti. Ularning olib borayotgan siyosatidan quvonib, oilaviy korxonamizga ‘Shavkat Miromonovich Mirziyoyev’ nomini qo‘yishga qaror qildik”, — deydi tadbirkor.
“Bugun egizak farzandli bo‘lgan ko‘pchilik bolalariga katta orzular bilan prezidentning ism-familiyasini qo‘ymoqda. Men ham yaxshi niyatda korxonamizga shu nomni qo‘ydim. Bu nomni berishdan oldin tumanimizning sobiq hokimi, rahmatli A’zamxon aka Bahromovdan maslahat so‘raganimda, ular fikrimga qo‘shilib, qo‘llab-quvvatlagan”, — deya qo‘shimcha qildi Abdulla Toshev.
Uning ta’kidlashicha, korxonani “Shavkat Miromonovich Mirziyoyev” nomi bilan ro‘yxatdan o‘tkazishda davlat organlari tomonidan hech qanday e’tiroz yoki qarshilik bo‘lmagan.
“Ammo korxona faoliyati yo‘lga qo‘yilganidan so‘ng bu nom ko‘pchilikda qiziqish uyg‘otgan, turli savol va iliq fikrlar bildirilgan. Korxona nomini bannerlarga yozib, reklama sifatida biror joyga ilib qo‘ymaganmiz. Bu nom faqat hujjatlarda yozilgan, uni bank, soliq xodimlari biladi, xolos”, — dedi “Shavkat Miromonovich Mirziyoyev” oilaviy korxonasi rahbari.
Avvalroq, 2020-yil iyunida Surxondaryoda “Voy Mani Okahonlarim” nomli, yirik shoxli qoramollarning sut beradigan zotlarini ko‘paytirish bilan shug‘ullanuvchi oilaviy korxona ro‘yxatdan o‘tkazilgan edi. Keyinchalik korxona nomi “Akbar Ali Adolat” deb o‘zgartirilgan.
2020-yil mayida Jizzax viloyatida “Vapshe malades bala” nomli, keng assortimentdagi tovarlar ulgurji savdosi bo‘yicha agentlar faoliyati bilan shug‘ullanuvchi kompaniya ro‘yxatdan o‘tkazilgani ma’lum bo‘lgan edi.
2019-yil avgustida esa Toshkentda “Lyubaya biznes xorosha” nomli mas’uliyati cheklangan jamiyat tashkil etilgan edi. KTYaDR ma’lumotlariga ko‘ra, korxona maishiy elektr tovarlar ulgurji savdosi bilan shug‘ullanadi.
Xalq orasida ommalashib, “qanotli jumla”ga aylangan iqtibos va naqoratlarning kompaniyalar nomiga aylanayotganiga munosabat bildirarkan, O‘zbekiston adliya vaziri Ruslanbek Davletov buni “yengillik samarasi” deb atagan edi. “Xohlagan odam internet orqali ‘Lyubaya biznes xorosha’ va boshqa nomdagi MChJlarni ro‘yxatdan o‘tkazdi. Bu ozodlik, yengillik degani”, — degandi vazir.
Izoh (0)