Nurafshonda voyaga yetmagan bolani zo‘rlashda ayblanayotgan fuqaro sud binosidan qochib ketdi

Toshkent viloyati Nurafshon tumanida 21-oktabr kuni soat 17:00 lar atrofida voyaga yetmagan bolani zo‘rlashda ayblanayotgan 34 yoshli erkak shahar sudi binosidan qochib ketdi. Bu haqda huquqni muhofaza qilish organlaridagi manbalariga tayanib, Repost xabar berdi.

Ma’lum qilinishicha, erkakning ismi Sherzod Abdulahatov, millati o‘zbek, vaqtincha ishsiz. Unga nisbatan Jinoyat kodeksining 118-moddasi (nomusga tegish), 25-moddasi (jinoyatga tayyorgarlik ko‘rish va jinoyat sodir etishga suiqasd qilish), 119-moddasi (jinsiy ehtiyojni zo‘rlik ishlatib, g‘ayritabiiy usulda qondirish) bilan jinoiy ish qo‘zg‘atilgan.

Bundan tashqari, erkak ilgari to‘rt marta sudlanganligi haqida xabar berilgan:

• 2010-yil 1-yanvar — Rossiya sudi tomonidan Rossiya Jinoyat kodeksining 213-moddasi (bezorilik) 1-qismi;
• 2014-yil 16-aprel — Jinoyat ishlari bo‘yicha Mirobod tuman sudi tomonidan Jinoyat kodeksining 166-moddasi (talonchilik) 2-qismi “a” va “b” bandi;
• 2014-yil 19-sentabr — Jinoyat ishlari bo‘yicha Bo‘ka tuman sudi tomonidan 119-moddaning (jinsiy ehtiyojni zo‘rlik ishlatib, g‘ayritabiiy usulda qondirish) 1-qismi, 2-moddasi “a”, “b” bandi hamda Jinoyat kodeksining 166-moddasi (talonchilik)
• 2017-yil 16-oktabr — Jinoyat ishlari bo‘yicha Quyi Сhirchiq tuman sudi tomonidan Jinoyat kodeksining 169-moddasi (o‘g‘rilik) 2-qismining “d” bandi bilan aybdor deb topilgan.

Qayd etilishicha, erkak ilgari uylangan va ajrashgan. Uning bir nafar farzandi bor.

Toshkent viloyati IIBBning ma’lum qilishicha, huquq-tartibot organlari xodimlari tomonidan olib borilgan tezkor qidiruv surishtiruv ishlari davomida gumonlanuvchi 22-oktabr kuni Nurafshon shahri hududida qo‘lga olingan.

Hozirda fuqaro himoyachi xizmati bilan ta’minlanib, gumon qilinuvchi tariqasida jalb qilingan va ish holati bo‘yicha batafsil so‘roq qilinib, Jinoyat protsessual kodeksining 227-moddasi (surishtiruvchining, tergovchining yoki prokurorning qaroriga binoan ushlab turish) talablari asosida ushlanib, dastlabki tergov harakatlari olib borilmoqda.

Avvalroq sirdaryolik erkak maktab hojatxonasida 8 yoshli qizga nisbatan axloqsiz harakatlarni amalga oshirgani ma’lum bo‘lgani to‘g‘risida xabar berilgandi.